Unammisunik nassuiaasartup Jakob Larsen ukiormanna sungiusaasutsialattut toqqarpaa
Unammisunik nassuiaasartut marluk Thomas Kristensen aamma Bent Nygaard tamarmik immikkut unammisartoqatigiinnik allstarinik katiterineranni Thomas Kristensenip Jakob Larsen ukiormanna sungiusaasutsialattut toqqarpaa, imalu oqaasertalerlugu:
- Semifinali sioqqullugu GOG-p Skjernimik ajorsartitserujussuarnissaanik oqartoqarsimassagaluarpat, ileqimisaartortugut arlaliusimassagaluarpugut. Unamminerit naggataanni qulingiluanik pointeqarput unamminerlu ataasiinnaq ajorsarfigalugu. Unammisartut tusaamasarpassuartaqanngitsut taamatut angusaqarsinnaanerat kusanarluinnarpoq. Jakob Larsenip suliamigut angusai ajunngilluinnarput.
Unammisunik nassuiaasartoqataata taamatut naliliinera isumaqatigaa, taassumali Sønderjyskep sungiusaasua, Morten Henriksen, ukiormanna sungiusaasutsialattut piukkullugu.
- Suliama nersualaarneqarnera nuannaarutigalugulu tanngassimaarutigalugulu qujamasuutigaara. GOG-mi ukioq unammisaqattaarfiusoq iluatsilluarparput. Unammisartoqarpugut piumassuseqarluartunik unamminernilu tamani ajugaanissatsinnik ilungersortuarsimasunik. Unammisartut pitsassuarnit aamma sullinneqarput, tamarmillu nersualaarneqartariaqarlutik, Jakob Larsen Sermitsiaq.AG-mut taam oqarpoq.
Jakob Larsen GOG-mi ukiut marluk sungiusaasooreerpoq.