Unammisitsinissaq taamaatiinnarpaat

- Taarsiullugu allatut iliulersaarpugut, tassa aningaasaliisussarsiornermik misilittakkavut tusagassiuutinillu suleqateqarnermik misilittakkavut isumasioqatigiissitsinikkut paarlaasseqatigiinnissaq siunniunniaratsigu.

- Timersuutinik assigisaannillu unammisitsinermik misilittagallit allat, soorlu Arctic Circle Race-imik aaqqissuisut soqutiginnittullu allat, soorlu suliffeqarfiit peqatigalugit Tasiilami juunip qaammataani pisussamik isumasioqatigiissitsiniarpugut, Anders Stenbakken oqarpoq.

Timersuutinik aaqqissuussinerit aningaasatigut Kalaallit Nunaannut annertunerusumik iluaqutaasinnaalernissaat pingaarnertut matumani anguniarneqarpoq, isumasioqatigiissitsinissarlu alla ukiaru pisussaq ilaatigut takorloorneqarluni.

Suliffeqarfiit annerit, soorlu Royal Greenland aamma Air Greenland assigisaallu isumasioqatigiissiitsinermi peqataanissaat takorloorneqarpoq, kitaanilu pinissaa pilersaarutaalluni.

Siku Extreme Arctic Challenge-imilli taamaatitsiinnartariaqarneq Anders Stenbakkenip qanoq isumaqarfigaa? Ima akivoq:

- Taamatut aalajangertariaqarneq uannut ajornaatsuinnaanngilaq, tassami 1999-imiilli aallutarigakku, oqarsinnaavungali taamatut aalajangiisariaqarneq pissusissamisoortutut isigigakku, aningaasakilliortoqarmat. Unammisitsinermut aningaasaliisussat naammanngillat, Tasiilallu kommunia aningaasatigut maanna ajornartorsiormat, erseqqissaatigissavarali Siku Extreme Arctic Challenge ukioq manna naggataartussaagaluarmat, Anders Stenbakken Radioaviisimut oqarpoq.

Siku Extreme Arctic Challenge juulimi ingerlanneqartussaagaluarpoq, holdillu peqataaniarlutik nalunaarsimasut 16-iugaluarlutik.