Unammisitsineq: Innuttaasunik peqataatitsineq qanoq pitsaanerulersinneqarsinnaava?

Pisortat tusarniaanermi atortussat saqqummiussaat innuttaasunut nalinginnaasunut paasiuminaassinnaasarput, aamma peqquserluttuliornermik akiuiniaqatigiiffik isumaqarpoq innuttaasunik ataatsimiititsisarnerit ikippallaartut, ataatsimiititsinissamut kingusippallaartukkut aggersaasoqartartoq aammalu ataatsimiititsinerit piffissami akunnatumi ingerlanneqartartut.

- Innuttaasut, suliniaqatigiiffiit pisortanilu oqartussaasut innuttaasut pitsaanerusumik peqataatinneqarnissaannik ujartuipput, qanoq iliornikkut tamanna angusinnaavarput? Innuttaasut akornanni oqallinnerup pitsaanerulersinneqarnissaanut isummersueqataagit, Transparency International Greenland (TIG) nittartakkamini taama kaammattuuteqarpoq.

Innuttaasunik peqataatitsineq pitsaanerusoq - imatut

TIG Nuummi oktobarip 28-ani isumasioqatigiissitsissaaq 'Innuttaasunik peqataatitsineq pitsaanerusoq - imatut' qulequtaralugu. Tassungalu atatillugu unammisitsinermi ajugaasoq saqqummiunneqassaaq.

Kikkulluunniit Nunatsinnut attuumassuteqartut peqataasinnaapput, allaaserisat, assit filmeeqqallu atorneqarsinnaallutik. Suliarineqartut siunissami suliniutaasussanut isumassarsiorfigineqarsinnaassaapput, piviusorsiortuussallutik, tunngavilersorluagaallutik atorminartuullutillu.

Suliat kalaallisut danskisulluunniit tunniunneqarsinnaapput.

Siunnersuutit TIG-mut kingusinnerpaamik oktobarip 19-ani tunniunneqareersimassapput, mailikkut info@transparency.gl-imut imaluunniit allakkatigut uunga Postboks 1613, 3900 Nuuk.

Unammisitsineq pillugu paasissutissat TIG-p nittartagaani atuarneqarsinnaapput.