Unammisartut Puerto Ricomukarnissamut piareertut
Nunanut allanut unammisartut tallimanngormat Københavnimut tikipput, sapaatiuppallu Puerto Ricomut NORCA-turnerinngimut peqataajartorlutik aallassapput. Unammisaqattaarnermi angusarissaarunik Pan Americami pissartanngorniuunnissamut anngussinnaapput, tamannalumi pingaarnertut anguniagavoq.
Nunanut allanut unammisartut sungiusaasuat unammisartut piareersimanersut aperineqarami akivoq:
- Aap, aatsaat taama piareersimatigaat. Unammisartut sukataarnikooqaat, sapaatip akunnerani ullut arfinillik arfineq marlulluunniit sungiusartarput. Ajunngeqaaq, unammisartut aamma imminnut nuannariipput, tamanna pingaaruteqarpoq, Johannes Groth KNR-imut oqarpoq.
Unammisaqattaarnissami arsaattut ataasiakkaat kiisisa naatsorsuutigineqanngitsut sungiusaasup oqaatigaa.
Unammisartummi tamarmik pikkorissuupput, arsaaffimmilu inissisimaffiit assigiinngitsut inuttassaqarluarlutik, unamminerit ataasiakkaat aallaavigalugit unammeriaatsimik allannguisarnissamik periarfissaqarluni.
Måliniittut pingasuunikuugaluartut marluinnanngortippavut unammisartullu ataatsimik ilallugit. Taamaasilluta pisariaqalissappat arsariaatsimik allannguisinnaassaagut.
Stregimiittussanik assigiinngitsunik pingasunik peqarpugut, backimi saamerlermiittussanik assigiinngitsunik aamma peqarpugut, tamarmillu unammeqataariaannaallutik. Sungiusaasutut taama periarfissaqarluni ajunngeqaaq, Johannes Groth oqarpoq.
Assammik arsartartut marsip 28-ani Puerto Ricomukarunik sapinngisartik tamaat angusarissaarnissartik anguniassavaat.
Nunanut allanut unammisartut Pan Am-imut anngutissagunik NORCA-turneringimi angusarinnernit pingasuni ilaasariaqarput, tamannalu Mexicop NORCA-mit tunuarnerata kingorna piviusorsiortuusoq, sungiusaasup oqaatigereerpaa.
USA, Puerto Rico aamma Den Dominikanske Republik kalaallit NORCA-mi unammissavaat.
AAMMA ATUARUK Nunanut allanut unammisartut piareerput