Unamminissamut piareerput
- Tamanna isumalluartitsilerpoq, nunanut allanut sungiusaasoq Lauritz Heilmann, Italiap kujasissuaniit, nunanut allanut unammisartut maanna najugaqarfigisaanniit oqarpoq.
Nunanut allanut sungiusaasup oqarnera naapertorlugu, sissap eqqannguani najugaqarneq ajunngeqaaq, unammisartulli bussinik uteqattaartariaqassapput.
- Hoteli najugaqarfipput illoqarfimmi Margherita di Savoiami inissisimavoq, illoqarfimmit unammiffiusumit, Barlettamit, kilometerit 20-t missaannik ungasitsigisumiilluni, taamaammat bussinik uteqattaartariaqarpugut. Taamaakkaluartoq najugaqarfipput eqqissisimasumiippoq, unamminissamullu piareersarluarnikuuvugut, Lauritz Heilmann nassuiaavoq.
EM-imut unammisartut 423-t ukioq manna peqataassapput, nunanit 35-neersut, ujammillu kuultit 108-t pissarsiassaasussaapput.
