Unamminermi uumasunik naalliutsitsinissaq pinaveersaarneqassaaq

Avannaata Qimussersuata aallartinnissaanut ullut pingasuinnanngorput. Unammersuarneq uumasut nakorsaata uumasunik naalliutsitsinerunerarpaa.

Avannaata Qimussersuani Ilulissani ukioq kingulleq sukkaniuttoqarmat, qimmit 100-t missaat, qasulinngikkunik ajoqusersimasut, unamminerup nalaani qimaannarneqarlutik pituutai kipineqarsimapput.

Qimuttullu pillugit inatsisartut inatsisaannik tamanna unioqqutitsinerusoq, qimminillu naalliutsitsinerusoq, uumasut nakorsaat Ilulissaniittoq, Marit Holm, oqarpoq.

-Qimussimik unamminerup ingerlanerani, qimuttut ilaat malinnaasinnaajunnaartarput, imaassinnaasarpoq qamutinit nanerneqarsimallutik ajoqusersimasut, ilaannikkut ingerlaannaq toqusinnaasarput, imaluunniit ajoqusersimallutik inuttaminnit pituussaaginnarneqartarput. Ilaannikkut qimmuttut pituussaarneqarsimasut qaqqaniit angerlaqqinngisaannartarput. Qaqqanummi qimaasarput, taamaasillutillu sivisuumik kisimiillutik qiulerlutik perlilerlutilluunniit toqusarlutik, tamannalu ajoraluarpoq, Marit Holm oqarpoq nangillunilu: - Neriuppunga Avannaata Qimussersuani ataatsimeersuartut siunissaq eqqarsaatigalugu, kalaallit nunaanni qimuttut pillugit inatsisartut inatsisaat malilerumaaraat, unamminermilu inatsisinut ilanngukkumaaraat.

Uumasut nakorsaat Ilulissaniit taama oqarpoq. Qasigiannguani Avannaata Qimussersuaqarnissaanut taanna malinnaajartussaaq.

Avannaata Qimussersua ulluni makkunani aamma ataatsimeersuarpoq, unammisarnerni inatsisinik allannguisinnaaneq ilaatigut eqqartorneqarluni.

Tamanna itinerusumik ulloqeqqanut Radioaviisimi tusagaqarfigiumaarparput.