Qulaarpaa Unammillertip TELE kinguarsaaneraraa

Soorlu siusinnerusukkut eqqartorneqareersoq TELE Post namminersortunngorsarneqarnissaminut piffissarititaasumut aprilip aallaqqaataanut piareernavianngilaq. Ullumili KNR-ip oqaluttuarisinnaavaa, namminersortunngorsaanissamut piareersarneq februaarimi unitsinneqarami piareersarneqangaatsiareersimagaluartoq.

Kinguaattoorneq telestyrelsemeersumut, Nikolaj Odgaardimut, uissuummisitsivoq.

Pilersaarutaasimagaluarpoq Tele januaarimili piareersimassasoq.

- Naatsorsuutigisimagaluarpara januaarip aallaqqaataani piareersimassalluta, taamali pisoqanngimmat isumalluarsimavunga kingusinnerpaamik apriilip aallaqqaataani piareersimajumaarluta, taanna oqarpoq.

Tele'p naatsorsussavaa, telemut tunngasunik tuniniaaviit nutaat Tele'p netværkiisa atornerinut qanoq akiliisassanersut, soorlu søkabelip radiokædellu atornerinut. Naatsorsuinissarli ajornakusoortorujussuuvoq. Maanna paasineqarpoq februaarimi suliaq unitsinneqarmat naatsorsuilluni suliaq ingerlatingaatsiarneqarsimagaluartoq.  

- Suliatsinni ingerlangaatsiarsimagaluarpugut, kingullialunnguilli kisiisa amigaatigilersimallugit, taanna oqarpoq.

Siunnersortinulli akissaajaatit aqunneqarsinnaarpianngitsumik annertusiartupiloorsimapput, taamaattumik sulineq unitsinneqartariaqarsimavoq.

Unammillertaanni Inu:IT-mi pisortap Martin Gjødvadip nassuiaat taanna upperinngilaa.

Namminersortunngorsaanermilli Tele'p unitsitsinniaasimanerangaaneranik oqalunneq Steen Montgomery Andersenip akuererusunngilluinnarpaa.

- Kinguarsaaniarsimanermik kissaateqarsimanngilagut. Ilisimaqqissaarparput Inatsisartuni namminersortunngorsaanissaq aalajangiunneqarsimasoq, taava soorunami namminersortunngorsarneqassaaq. Tamanna nalornisigineqassanngitsoq pisortap erseqqissarpaa.

Sisamnngornerpat unnukkut namminersortunngorsaanerup ajunngitsortai ajortortaalu KNR-TV-kut Qulaarpaami eqqartorneqassapput. Kalaallisuua 19.30 qallunaatuualu 20.30 aallakaatinneqassapput.

Aamma atuaruk Qulaarpaa Namminersortunngorsaanniarneq qularnartoqarpoq

Aamma atuaruk Qulaarpaa Oqarasuaatit angallattakkat internetsilu akikitsut Telep aqutsisuisa upperaat

Isummersuutit


 

Pages