Unammillernerulerneq Qasigiannguanut sunniuteqarpoq
Royal Greenlandip Halibut Greenlandimit unammillerneqarnini malugaa, tassami qalerallit Qasigiannguani tunisassiorfimmut tunisarineqartartut ikiliartuinnarsimapput, kinguneranillu tunisassiorfik aasaanerani matoqqatinneqartalerluni.
Allattoq Else Løvstrøm
oktobarip 13-at 2009 06:09
Royal Greenland pisarnermit annikinnerujussuarmik qaleralinnik qerititsisimavoq.
- Taamaasilluni januaarimi, februaarimi marsimilu Qasigiannguani suliffissaqartitsinissaraluaq eqqugaasinnaasoq, Royal Greenlandimi ingerlatsinermut pisortaq Steen Sørensen Radioaviisimut oqarpoq.
Nalinginnaasumik qalerallit Ilulissani tunineqartut Qasigiannguanut assartuunneqartarput. Imaluunniit qeritinneqartarlutik.
- Massakkullu Halibut Greenlandip tunitsivik attartugaa ”Rubin” avannarteqqanikuulluni Ilulissanut uteqqippoq, pissanganarporlu piffissami qaninnermi Qasigiannguani qaleralinnik tunisassiassanik amigaateqartoqaqqilissanersoq, Steen Sørensen Radioaviisimut oqarpoq.
