Nukissiorfiup pisortaa, Kaspar Mondrup.Assi: Malik Brøns / KNR

Unammillernartoqaratarsinnaanera piareersimaffigisariaqarparput

Nukissiorfiup ippassaq ilisimatitsissutigereeraluaraa Nuummi sarfaq pissusissamisut ingerlaqqilernerarlugu, ingerlatsivik nalunaaqqippoq kabelip sermernera anorilu pissutaalluni kabeli qajannarsinnaasoq.

Erngup nukinganik nukissiorfik sapaatip akunnerata ingerlanerani Nuummi sarfaarutitseqattaareersorlu ippassaq aaqqeqqinnerarlugu Nukissiorfiup nalunaarutigaa.

Nukissiorfik aaqqiissutaagallartumik kabelimik (pituutarsuarmik) iluarseereersorlu Nukissiorfik aamma nalunaaqqippoq kabeli suli qajannarsinnaasoq ilisimatitsissutigalugu.

Aaqqiissutaagallartumik iluarsiisoqarnerani kabelinut atassusiisumik noqqillannaveerlugu pitussisoqaraluarpoq, kaabililli atassuserneri sermertoorsimapput anorilu aamma sakkortummat kaabilimut qajannarsisitsisut Nukissiorfiup ilisimatitsissutigaa.

AAMMA ATUARUK Nukissiorfiit: Erngup nukinganik nukissiorfik aaqqeqqippoq – juullimut qulliit ikissinnaavasi

 

Anori sermerlu

Tassalu imaappoq, maanna Nuummi anorersuarnissaa ilimasaarutigineqarpoq tamannalu aamma Nukissiorfimmi sulisunut upalungaarsimatitsilerpoq, tamannalu isumaqarportaaq imaaratarsinnaasoq kabeli qajannarsisoorpata aamma sarfaaruttooqqittoqarsinnaasoq, tamannalu soorunami Nukissiorfimmiit kissaatigineqanngikkaluartoq Nukissiorfiup tusagassiutinut nalunaarummini allappaa.

Aaqqiissutaagallartutullu iliuuserineqartoq tassaanerarneqarpoq pitsaanerpaamik maannakkut pissutsit atuuttut eqqarsaatigalugit aaqqiissutigineqarsinnaasut pitsaanersaat.

- Nunatsinni nunami issittumi silap atugassarititai sakkortusinnaapput, tassalu imaappoq silap qanoq innera apeqqutaalluni upalungaarsimajuartariaqartarpugut, Nukissiorfimmi pisortaq Kaspar Mondrup tusagassiunut nalunaarummi taama ilaatigut oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl