Unammilleqatigiittoqarnerulernissaq Inatsisartut oqallisigissavaat

Isumaqatigiissutini killilersorneqanngitsumik unammillersinnaanermut akornusiisuni oqartussat akuliunnissaat apeqqutaasarput, ullutsinnilu nakkutilliinermi tamanna tunngaviulluni.

Unammilleqatigiinnermik killiliisut isumaqatigiissutit aallaaviatigut inerteqqutaalernissaat allannguutissatut siunnersuummi pingaarnersatut anguniarneqarpoq.

Periaaseq pineqartoq EU-mi nunanilu avannarlerni ullumi atorneqarpoq.

Unammilleqatigiinnermik killiliisunik isumaqatigiissuteqartarnerup aamma salliulluni inissisimanermik atornerluinerup inerteqqutaalernissaa siunnersuutip kingunerissaavaa.

Aallarnisaasartunut allanut suliffeqarfinnullu mikisunut niuerfigisami tassani inissinnissamut ajornartitsineq inerteqqutaavoq, soorluttaaq unammillertinik niuerfigisamit sukkasuumik anisitsisinnaasumik pisisartunik isumaqatigiissuteqarneq inerteqqutaalissasoq.

- Takorluugaq tassaavoq suliffeqarfinnut pilersinneqareersimasunut atukkat pitsaanerpaat pilersinnissaat, aallarnisaasartut inuiaqatigiinnilu nukiit pilersitsisartut namminerminnut inuiaqatigiinnilu naleqartumik pilersitsinissamut qiimmassassallugit, Inuutissarsiornermut naalakkersuisoq Siverth K. Heilmann allappoq.

Unammilleqatigiinnermik equngalersitsisumik unioqqutitsilluni oqartussat tapiissuteqartannginnissaat inatsitigut anguniarneqarpoq, niuerfiusumilu unammilleqatigiinnermik equngalersitsisumik unioqqutitsilluni tapiissuteqarsimanerit utertillugit akilerneqartalernissaat aamma anguniagaalluni.

Kommunit inuutissarsiornikkut aningaasaliissagaangamik Unammilleqatigiinnermut Nakkutilliisoqarfimmut saqqummiussaqartalissapput.

Inatsit pineqartoq Namminersornerullutik Oqartussanut aamma sunniuteqassaaq, taakku inuussutissarsiutinut soqutiginninnersut apeqqutaalluni.