Unammilleqatigiinnermut inatsit nutarteqquaat

Unammilleqatigiinnermut inatsisip ullutsinnut naleqqussarneqarnissaa Unammilleqatigiinnermut Ataatsimiititaliap kissaatigeqqippaa.

Unammilleqatigiinnermut inatsit ullutsinnut naleqqukkunnaarsimasoq, ullumikkullu pissutsinut nutaanut akornutaasinnaasoq, ataatsimiititaliaq isumaqarpoq, tamannalumi Qaqortumi maajip 26-ani ataatsimiinnermini naqissuseqqippaa.

- Unammilleqatigiinnermut inatsit 1992-imeersoq Danmarkimi inatsisit assiliinnangajallugit suliaavoq, taamaattumik Danmarkimi nunatsinnilu niuernermi pissutsit assigiinngilluinnarnerat eqqarsaatigalugu inatsisip nutarterneqarnissaa piffissanngorpoq, Unammilleqatigiinnermut Ataatsimiititaliap siulittaasua Carl-Aage Skovaa tunngavilersuivoq.

Aamma ullumikkut inatsit atuuttoq naapertorlugu Unammilleqatigiinnermut Ataatsimiititaliaq equngassuteqartutut nalilikkaminik nammineerluni iliuuseqartinnagu suliffeqarfiit qanorluunnit ingerlatsisinnaapput, sallersaasutut inissisimanerminnik atornerluinissaq inerteqqutaareersoq unioqqutinngikkunikku.

Taamaattumik Ataatsimiititaliaq isumaqarpoq, inerteqqutisiortoqartillugu ingerlaannavik atulertarnissaat, imaanngitsorlu ullumikkutut ataatsimiititaliaq nammineerluni iliuuseqanngikkaangat killilersuiniartoqartarluni. Periuserlu tamanna nunani allani aamma atulereermat, nunatsinni atorneqalernissaa kissaatigalugu Carl-Aage Skovaap erseqqissaatigaa.

Taamaattumik oqaaseqatigiinnik nutaanik allattussanik suleqatigiissitaliortoqarnissaa ataatsimiititaliap kissaatigaa, aatsaalli taama isummertoqalinngilaq.

Suleqatigiissitaliornissaq 2002-mili ukiukkut siunniunneqarpoq, ulloq mannali tikillugu suli iluatsinneqarsimanani.

Unammilleqatigiinnermut Ataatsimiititaliaq Inuussutissarsiornermut Pisortaqarfiup akisussaaffigaa, oqaaseqartitsiniaraluaratta iluatsinngilarput.