Unammilleqatigiinnermut ataatsimiititaliaq akit minnerpaaffissaannik oqallinnermut ilannguppoq

Saarulliit akiisa minnerpaaffilerneqarnissaat pillugu aalisartut piumasaqaataannut tunngatillugu oqallinneq unammilleqatigiinnermut ataatsimiititaliamit akuliuffigineqarpoq. Akinik minnerpaaffiliinissaq, ataatsimiititaliap siulittaasuata, Carl-Aage Skovaap, inasssutiginngilaa.
Allattoq Jens Thorin
juulip 07-at 2009 17:48

Saarulliit akii Nunatsinniunngitsoq nunarsuarmili niuffaffinni aalajangerneqartartut erseqqissarpaa.

- Saarulliit piffissap ilaani isertitsilluaataasarput, piffissanili allani isertitsissutaarpiassanatik. Arlaat isumaqarunik, Royal Greenland aalisakkanillu tunisassiortut allat, aalisakkanut akiliinikippallaartut, taava namminneerlutik tunisassiorfiliussagunik akornuserneqarnavianngillat, Carl-Aage Skovaa oqarpoq.

Unammilleqatigiinnermut ataatsimiititaliap siulittaasua Sermitsiaq.gl-imut oqarpoq, akinik minnerpaaffiliineq sinnassaataaginnalersinnaasoq, naammassisaqarsinnaassuseq isertitaqarnerlu, inuiaqatigiinnit kissaatiginartoq, qulakkeernagu.

Carl-Aage Skovaap tikkuarpaa, akit minnerpaaffilernerisigut pisakittarluni aalisarneq, unammillernerup akiuussinnaanngitsoq, attatiinnarneqassasoq.

- Pisortat aningaasaligaannik akinik minnerpaaffiliinikkut pisakilluni aalisartarneq attatiinnarneqassaaq.

Aningaasat tapiissutigineqartussat inuussutissarsiutit allat ineriartortinnerinut atoraanni pitsaanerussaaq, Kalaallit Nunaata aningaasaqarnerata imminut nappatilernissaanut iluaqutaassammata, unammilleqatigiinnermut ataatsimiititaliap sulittaasua oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq