Unammilleqatigiinneq aalisartut ujartorpaat

Akileraartarnermut atugarissaarnermullu ataatsimiisitaliaq aalisartut piniartullu inuiaqatigiinni allanut sanilliullutik ajornerusumik inissisimannginnerarlugit nalunaaruteqarpoq.

Tamanna Kullorsuarmi aalisartut piniartullu peqatigiiffiannit illuatungilerneqarpoq.

- Pissutigalugu uagutsinnut isorliunerusuni najugaqartunut, suna tamarmi akisunerpaajuvoq. Maannalu nioqqutissat aammalu ikummatissat allallu akitsoraluttuinnarlutik. Taavalu taanna aningaasaq ukiorpassuarni isertittagarput, qalerallit akii eqqarsaatigalugit ukiorparujussuarni nikinngisaannarpoq, Thimothæus Petersen, Kullorsuarmi aalisartut piniartullu peqatigiiffiata siulittaasuata tullia oqarpoq.

Akileraartarnermut atugarissaarnermullu ataatsimiisitaliap oqariartuutigaa aalisartunut piniartunullu immikkut tapiissuteqartarnissaq tunngavissaqarpianngitsoq. Tamannali Thimothæus Petersenip isumaqatiginngilaa.

- Maannakkut tapiissutinik pisariaqartitsivugut angallatit iluarsarnissaat aammalu angallatitaarniarit allallu eqqarsaatigalugit. Aammalu tunisassiorfik kisermaassilluni ingerlatsiviusoq Upernavik Seafood tunisassiorfiutillugu akeq taannaajuartillugu katersinissarput nukippassuarnik atuiffiusussaavoq, Thimothæus Petersen oqarpoq, nangillunilu:

- Uani taamatut oqariartortoqassappat, assut eqqummaariffigeqqunaraluarpoq unammilleqatigiinnerup, toqqissisimasumik eqqissisimasumillu, soorlu Upernaviup eqqaani atuutsinneqalersinnaanera. Taamaalilluni aalisartut aningaasaqarnerat pitsaanerusumik ingerlalersinnaangaluarmat, taama Thimothæus Petersen oqarpoq.