Unammerngaartussaq neriuuteqaqaaq

Arctic Cicle Race Sisimiuni ullap tungaa qulinut aallartippoq. Unammerngaartussat ilaata, sungiusarluni ukioq manna aatsaat aallartittup, unammeqataanissani neriuuteqarfigeqaa.
Assi © : Aalut Lennert/ACR
marsip 31-at 2017 16:41

Unammerngaartussaq Kista Hammeken Lennert 31-nik ukiulik, Arctic Circle Race-mi peqataanissani sinnatoriuartarsimallugu oqarpoq:

- Aatsaavissuaq peqataalerpunga, Danmarkimi najugaqarnikuugama usorussuataartarnikuugama kiisami tassa periarfissarilerakku ilaanissara peqataasinnaanissara, Kista Hammeken Lennert unammisut 208-t akornanniippoq. 

Taanna sungiusarluni ukioq manna aatsaat aallartippoq. Taammaakkarluartoq 160 km-inik isorartussusillip unammeqataaffiginissaanut piareersimasutut misigisimavoq.

- Pissanganaqaaq. Assut pissangaqaanga, kisianni tassa takilaartunik ingerlasaqattaarnikuugama misilittaallunga timera qanoq innikkut soorlu energiinik  pisariaqartitsinersoq tassa taakkua misilittarpakka. Neriuppunga tassa. Misigivunga piareersimallunga, ACR-mut unammigiartut nunanit assigiingitsunit 16-usuni ilaat Nuummeersoq Kista Hammeken Lennert taama oqarpoq.

Taassumali angusarissaarluarnissani unammisartutut allatuulli kissaateqarfigaa.

- Neriuppunga tassa sisorarluarumaarlunga aamma pinngortitarsuaq soorunami aamma taanna atorluarlugu tassa misigissutsit assigiinngitsorpassuit piareeqqaffigaakka. Ilimagaara qummut ammullu misigissutsikka ingerlajumaartut,

Kista Hammeken Lennert taama oqarpoq.

ACR ullumi pingasunik ingerlanneqassaaq. Unammiffissami isorartussutsit marluupput, isorartuneq 160 km-iuvoq aappaalu 100 km-iulluni.