Ummasunik illersuiniaqatigiit IWC pakatsissutigaat
- Arferit misigissuseqartuupput. Anniarsinnaapput, sianiutimikkullu qasusoorujussuarsinnaallutik. Ilisimaatuussutsikkut qasseerpassuartigut tamanna takussutissarsineqarnikuuvoq, arferilli pillugit nunat arfanniartartuusut soqutigittaatsuunerat, nunat arfanniartartuusut sapaatip akunnerup massuma ingerlanerani takutereerpaat, Gitte Buchhave, WSPA-Danmarkimi pisortaq oqarpoq.
Arferit eqqissisimatitaanerunissaat pillugu Tuluit siunnersuutaat, Norgemit, Islandimit Japanimiillu itigartinneqarpoq. Danmarkilu, Kalaallit Nunaat Savalimmiullu sinnerlugit IWC-mi ataatsimeeqataasoq, siunnersuut pillugu nipangersimaannarpoq, WSPA-p pakatsissutigeqisaanik.
Arferit eqqissisimatitaanerunissaannut suliniutinik nunat arfanniartartuusut unitsitseqattaartarnerat quianaannarpoq. Arferit pisarineqaraangamik anniarujussuartinneqartarput. Aallaaneqarnermi kingorna akunneq ataaseq suli uumasinnaasarlutik, Gitte Buchhave allappoq.
Arferit qanoq iliornikkut aalisartut atortuinut ulorianartunut napitissinnaannginnissaat, naapertuutinngitsumilluunniit piniarneqannginnissaat pillugu suleqatigiissitaliortoqarnissamik tuluit ilaatigut siunnersuutigaat.
IWC-li avaqqullugu oqallittoqartuaannarnissaa tuluit neriorsuutigaat:
- Uumasunillu illersuiniaqatigiiffiup WSPA-p tamanna nuannaarutigilluinnar, Gitte Buchhave, aviisimut Kristeligt Dagbladimut oqarpoq.
