Umimmattassiissutit tuttutassassiillutillu piareerput
Ilulissaniit kimmut kujammullu Piniarnermut allagartallit tamarmik, killilersorneqanngitsumik pisassarititaasuni aavarsinnaatitaapput.
Piniarnermut allagartaq 50koruuneqarpoq, inatsisillu malillugit maajip aallaqqaataatinnagu akilerneqareersimassalluni. Sulilu akilerneqarsimanngippat akilernissaa angumerineqarsinnaavoq. Piniarnermik allagartartaarnissami inatsisaavoq minnerpaamik ukiut marluk Kalaallit Nunaanni najugaqarsimanissaq, taamaattorli immikkut akuersissummik pisoqarsinnaalluni.
-Pissutaavoq sumiiffinni killilersorneqanngitsumik pisassarititaasuni tuttoqarnerujussua, taama oqarpoq Kaare Winther Hansen, Ingerlatsivimmi - Aalisarnermut, piniarnermut, Nunalerinermullu immikkoortortaqarfimmi atorfilik.
Taamaattoorli oqaatigaa, kikkut tamarmik aavarniartut piniarnermut allagartaqassasut, lincenseqassasullu. Taamaattumik piniartut licens-imik qinnuteqarniarunik najugarisami kommuneanut saaffiginnissapput.
-Pingaaruteqarpoq aalisartut ajunngitsunik uppernarsaateqassasut, ukioq manna piniarnermut nakkutilliisut nalinginnaasumiit taamungaannaq tigooqqaallutik misissuissammata, Kaare Winther Hansen oqarpoq. Aammattaaq pingaaruteqarpoq aavarsimasut sivisunerpaamik sapaatit akunneri pingasut qaangiunnerini immersugassamut piniakkami allattorsimanissaat nalunaarsussallugit, kommunerisamullu tunniunnissaa.
Immersugassat nalunaarsukkat pingaaruteqartorujussuupput ingerlatsinermut oqartussaasut qularnaartussaammatigit malittarisassat eqqortut, piniagassat pitsaanerpaamik pigineqaqqullugit, Kaare Winther Hansen, Aalisarnermut, piniarnermut, Nunalerinermullu Ingerlatsivimmi atorfilik oqaluttuarpoq.
