Umimmannik ungoorisinnaaneq oqilisaataassaqaaq

- Piffissamik atuilluarnarnerulissaaq nukippassuarnillu aamma atuisoqarunnaassalluni, piniartoq Henrik Fleischer, Sisimiut, oqarpoq.

Aalisarnermut, Piniarnermut Nunalerinermullu Naalakkersuisoqarfik ullumi nalunaarpoq umimmaat illersugaanerannut piniagaanerannullu peqqussut nutarteqarneqarsimasoq. ”Piniartut inuussutissarsiutigalugu piniarsinnaanermut allagartallit immikkut akuersissuteqarnikkut snescooterinik, sisamanik assakaasulinnik helikopterimilluunniit ungoorisinnaanissaminnut periarfissinneqarput”.

Henrik Fleischer Kangerlussuarmi qimussimik ukiorpassuarni umimmanniartarpoq. Henrillu isumaqarpoq peqqussut nutaaq piniartunut Sisimiuneersunut Maniitsuneersunullu piniariaatsimik nutaamik ammaassisasoq.

- Pitsaajallassaqaaq motorilinnik ungoorisoqatalerpat. Qimusserlunimiuna umimmanniarneq ilungersunarlunilu timimut nungusaataasartoq. Piniartut suleqatigiillutik nukipassuarnik atuinatik ungorisinnaanngussapput, Henrik Fleischer oqarpoq.

Kangerlussuup timaa aperpiarneq ajorpoq.

- Piniarfitsinni ilaannikkut itertarpugut eqqarput tamarmi aputaarussimavoq, anorimit tingitaasimalluni. Taamaattumik uagutsinnut pingaaruteqartorujussuuvoq snescooterinik sisaminillu assakaassulinnik ungorisinnaanngornerput, Henrik Fleischer oqarpoq.

Henrik isumaqarpoq umimmaap ungoorneqarnerminni neqaa allannguuteqarnavianngitsoq.

- Piffissaqarluarluni ungalukkanut imaluunniit qaqqanut ungalukkatut ilusilimmut ungoorneqarsinnaassapput, eqqissilluareerpatalu toqorarneqarsinnaallutik, Henrik Fleischer erseqqissaavoq. Henriup helikopterimik ungoorisarnissaq ornigivallaanngilaa.

- Taanna piniartunut allanut ungooriniartunut akornusersuiinnartassaaq, Henrik Fleischer oqarpoq.