Umimmannik tunisisinnaanissamut inatsit allanngorteqquaat
Nersutip nakorsaa Suliffeqarfiit inuussutissaleriffiusut pillugit Namminersornerullutik Oqartussat nalunaarutaat 1998-imeersoq tunngavigalugu taama aalajangiivoq. Tamanna Sisimiuni Angallateerarsorluni Aalisartut Piniartut Peqatigiiffiannit illuatungilerneqarpoq, inatsit, imaluunniit peqqussut matumani tunngaviusoq Nunatsinnut naleqqutinngitsoq oqaatigineqarluni. Peqatigiiffiup siulittaasua, Marius Olsen, ima oqarpoq:
- Taama neqit naleqartigisut taamatullu piniarneri ukiukkut ajornakusoortigisut issittorsuarmi piniartarmatigit, taamaaliinnarlugit tunuartinneqarsinnaanngillat. Aamma una 1998-imeersoq inatsit taakkartorneqartoq isumaqarpugut nunatsinnut naleqqussagaanngitsoq tassami taanna nersutaatinut puulukinut nersussuarnullu pigineqartunut uumasuutinut naleqqussagaavoq. Uagulli nersutaatigut nujuartaagamik allaanerusumik pineqartariaqaraluarput malittarisassiunneqarlutik naleqqussakkamik, Marius Olsen oqarpoq.
Tunngavilersuutimini ilaatigut pivaa pisisartut illersorneqarnissaat, taanna qiviarneqarsinnaannginnami?
- Soorunalimi aamma qiviarneqarsinnaavoq, kisiannili naleqqussaasoqartariaqarpoq pissutigalugu kia umimmassuaq ilivitsoq tuniniaavimmut eqqutissavaa? Kia umimmassuaq ilivitsoq nammallugu tikiutissavaa? Tamakkua tamarmik nalilersorneqartariaqarput, aamma takusareerpagut siornatigulli puisit allallu arferit suulluunniit aggoreerlugit tuniniarneqartartut taamatullu tuttut, Sisimiuni Angallateerarsorluni Aalisartut Piniartullu Peqatigiiffianni siulittaasoq Marius Olsen taama oqarpoq.
