Umimmanniariaaseq allanngortikkusunneqarpoq

KNAPK-p Nuka A/S-illu umimmanniartarnerup allanngortinneqarnissaanik oqallissaaruteqarput. Canadami piniariaaseq ilaarlugu piniartut amerlasuunngorlutik ungoorillutik umimmannik piniartalernissaat angorusunneqarluni.

Tønnes Berthelsen, Nuka A/S-imi pisortaq oqarpoq, tamanna kissaatigineqartoq neqip pitsaassusaa qaffassarneqassammat, neqillu asiutinnagu suliarineqartup annertusarnissaa siunertarineqarmat.

Piniarnermi Siunnersuisoqatigiinnit piniariaaseq orniginartutut isumaqarfigineqarpoq. Svend Heilmann, Maniitsumi piniartoq, KNAPK-lu sinnerlugu Piniarnermi Siunnersuisoqatigiinni ilaasortaasoq, piniariaatsimut assut soqutiginnippoq, neqip pitsaanerulernissaa taamaalilluni anguneqarsinnaammat.

- Umimmanniarneq ulorianannginnerusumik ingerlalissasoq isumaqarpunga, Svend Heilmann oqarpoq.

Svend Heilmann-ip ilanngullugu oqaatigaa, piniariaatsimik allanngortitsisoqarnissaanik pilersaarut iluatsissappat, piniartut qanimut peqatigalugit oqallinneq pilersaarusiornerlu ingerlanneqartariaqartoq.

Avatangiisinik Illersuiniaqatigiiffimmi UPPImmi ungoorilluni piniariaaseq aamma eqqartorneqarsimavoq. Jens Peter Lange-llu nalilerpaa piniariaaseq ajunngitsuusoq, peqqissaartumilli isumatusaarnermillu ingerlanneqartariaqartoq.