Umimmaat tiffasippallaarput
Kangerlussuup neqaarniarfianut ukioq manna ukiaanerani umimmaat neqaannik tunisinissamik pilersaaruteqarnerugaluaq piviusunngussanngilaq.
Taama ilisimatitsivoq Arctic Green Food-ip pisortaa
Tønnes Berthelsen.
- Isumap piviusunngitsoorneranut pissutaavoq umimmaat tiffasippallaarnerat. Pisarineqartut tiffasissumiit neqileriffimmut anngunniarnissaamut 8 tiiminut killigititaq angumerineqarsinnaanngilaq, taamaatumillu ukiaq manna tigooraasoqassanngikkallarpoq, Tønnes Berthselsen oqarpoq.
Ukioru umimmanniartoqalerpat Arctic Green Food-ip pilersaarutigaa siorna ukiukkut tunisaasut marloriaataat, tassa 50 tonsi sinneqartut pisiarineqarumaartut, ilaatigut Danmarkimi umimmaat neqaasa soqutigineqarnerulersimanerat pissutigalugu.
Umimmaat neqaasa aapaagu ukiakkut Kangerlussuarmi neqileriffimmut tunisaanissaat pilersaarutaasoq Tønnes Berthelsen oqarpoq.