Umimmaat piniagaanerat allannguuteqassaaq

Umimmaat ukiuunerani piniagaanerat ukiormanna allannguuteqartussanngorpoq. Siullerpaamik misiligutigalugu Maniitsup eqqaani qamuteralaat atorlugit umimmaat piniarfimmi 1-imi 2-milu unguneqartarnissaat piniarnermut pisortaqarfimmit akuersissutigineqarpoq.
Allattoq Mads Lynge
januaarip 15-at 2008 08:01

Qamuteralaat atorlugit ungusisarnissamut akuersinermi umimmanniarnerup pitsanngorsarneqarnissaa ilaatigut tunngavilersuutigineqarpoq kiisalu neqit tunisassiarineqartussat pitsaanerunissaat anguniarneqartoq, Aalisarnermut, Piniarnermut Nunalerinermullu pisortaqarfik nalunaaruteqarpoq.

Piniarnermut Pisortaqarfik ungusisarnissamut atatillugu arlalinnik aamma piumasaqaateqarpoq, tassa ungusinissamut ingerlaarfimmik umimmaallu toqorarneqarnissaasa tungaannut uninngatitsivissamik pilersaarusioqqissaartoqartarnissaa piumasaqaatigineqarpoq.

Maniitsup eqqaani taamatut umimmanniarsinnaatitaaneq ullumimiit marsip qulingata tungaanut ingerlanneqassaaq.

Taamatuttaaq Sisimiut Kangaatsiallu akornanni umimmaat katillugit 400-t ullumimiit marsip qulingata tungaanut pisassiissutigineqarput. Sisimiut kommunianni umimmaat katillugit 290-it pisarineqarsinnaassapput, Kangaatsiallu kommuniani umimmaat 95-it pisarineqarsinnaassallutik. Kiisalu 15-it tammajuitsussarsiniarluni umimmanniarnissamut atatillugu pisassiissutigineqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq