Umimmaat kisinneqalerput

Umimmaat Kangerlussuup eqqaaniittut kisinneqalerput, piniarnermullu nakkutilliisup maluginiarsimavaa tiffasissorsuarmi umimmappassuaqalersimasoq.

Umimmanniartartulli siku aqqusaartagaat ulluni makkunani aamma ulorianarpoq.

Piniarnermut nakkutilliisoq Hans Mølgaard suleqataalu Aqqalu Lyberth, ullup qeqqa sioqqullugu Kangerlussualiarput umimmannik kisitsissallutik. Kisitseqatigaat Pinngortitaleriffimmi suliamik aqutsisoq Christine Cuyler.

- Massakkut apeqqiallalaaleriarmat tamanna kujasissua, tatsip ataata kujataa, Tasersuaq, tamaanilu Iperariutaata nunataa, Angujaartorfiup nunaa, tamanna tikillugu massakkut misileriarnialerparput, aamma pissanganarpoq naammassisinnaassaneripput, ukioq manna aputaasannermik, Hans Mølgaard oqarpoq.

Aputaasannera uniffigineqarsimagaluartoq Kangerlussuup kangiata kujatikanniani Perserajooq, Ammalortukasik, qaqqat Kiinarissut Kujalliillu, Kangerlussuullu kitikanniani Orsuarnisarajuup tasiata kitaa kujataalu kiisalu Nakangajap tungaa kisitsiffigineqareersimapput.

- Tappikunga peqqaaratta assut umimmaqariartorujussuuvoq, siornaminngaanniit marloriaatipajaat takuagut tassani nunatami, Hans Mølgaard oqarpoq.

Umimmaat sumiiffiit ilaanni ikilisimagaluartut allani amerliartorput.

- Sineriappasissortaa umimmaasatsikkiartorusaarpoq, aamma piniagaajartorusaarnerat taanna apeqqutaalluni. Taamaattumik manna tiffasissorsuaq, ulluinnarni, umimmaat piniagaanerisa nalaanni inuit anguneq ajugaat, tappanna umimmappassuaqalernikuuvoq. Ajoraluartumik tappavani namminneq amerliartorusaaginnartuartuupput, ajoraluartumik inuit inugaanni. Tassa eqqissivillutik amerliartuinnarput, Hans Mølgaard oqarpoq.

Kisitsinermi ingerlaarfiit aalajangersimasut aqqutigineqartarput ataatsimoortullu takuneqartut tamarmik kisinneqartarlutik.

- Immikkoortiterlugit, soorlu mikinerpaamiik utoqqaliartortillugit tamaasa taagorlugit; arnaviaq, angutiviaq, piaraq, siornarnisaq, tamaasa allattugarisarpagut. Taava naatsorsoruminartikkiartulertarpaat kinguaassiorneri qanoq ingerlasut, Hans Mølgaard oqarpoq.

Nakangajap saavaniit nuua tikillugu sikua imaannanngorluni ammartitersimavoq, Tarajornitsullu nuuata tungaani siku saaliorsimalluni, kiisalu Umiiveralaat tungaat ilualu imaannanngorsimavoq.

- Iluatsillugu massakkut uloriasaarutitigipput mianersoqqussutigalugu tamaani angalasoqassagaluarpat sikua ulorianarluni saattuararsuummat, aamma sarfaritsikkuni suli ulorianarnerulertussaammat, Hans Mølgaard oqarpoq.

Silap allanngorarnera umimmaqassianut sunniinersoq Hans Mølgaardip oqaatigiminaatsippaa, umimmaammigooq pinertoqaat.

- Aput, aputeqanngissusialu soorlu malittarivallaanngikkaluaraat taakkua. Kisianni aputeqartorujussuusaarnikuuvoq qanga 90-ikkut aallartisimalerneranni, aamma taamaakkaluartoq umimmanikkiartorusaaginnavinnikuuvoq, aamma massakkut taamatut ingerlaannarpoq, Hans Mølgaard oqarpoq.

Hans Mølgaardip naatsorsuutigaa, silamit akornuserneqassanngikkunik sapaatip akunnera ataaseq kisitsissallutik.

Ilanngutassiaq unnugu Qanoruumi takuneqarsinnaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat