Umimmaarukkaluarneranut naggueqatigiit inuit pisuunngillat
Københavnip Universitetiani ilisimatusartut marluk umimmaat saarnginik itsarsuarnitsanik kingornuttakkanut tungasunik DNA-mik misissuisimapput. Taakkulu paasisaat paatsugassaanngilaq: Umimmaat nungunnerannut naggueqatigiit Inuit pisuunngillat.
- Umimmaqassutsip allanngorneranut inuit pisuunngillat. Inuit pisuussuteqannginnerat siullerpaamik maanna uppernarsarsinnaanngorparput, Paula Campos, Naalagaaffiup pinngortitaleriffiata katersugaasivianeersoq, aviisip Jyllands Postenip nittartagaanut oqarpoq.
Saqqaq-kulturimeersut umimmannik inuussuteqarnerat umimmaat nungunnerannut pissutaatinniarneqartaraluarpoq.
Misissuinernilli paasisat nutaat paasinarsisippaat, Nunatta inoqalernissaa ukiunik 20.000-inik sioqqulluguli umimmaarussimasoq. Issittumi inoqarfinni allani inuit umimmaallu imminnut akornusersuusimanngillat. Taamaalilluni umimmaat nerisarineqararluartut, amerlassusaannut tamanna sunniuteqarsimanngilaq.
Ilisimatusartut pasitsaassartik maanna misissuiffigileruttorpaat, tassa silap pissusaata sukkasuumik allanngornera umimmaat nungunnerannut pissutaasorileramikku.