Umimmaarniaqqusaannginnertik ernumanartoqartippaat
Uumasut nakorsaqarnerisigut immikkoortortaqarfimmit maanna piumasarineqalerpoq, Inuussutissaleriffiusut pillugit nalunaarut malillugu piniartut qerisunik tuniniassanngivissut, uffa umimmanniarnerup nalaani Kangerlussuarmi issittorsuusartoq, pisallu erngerlutik qerisartut. Silasiorfiit nalunaarsugaasa takutippaat februaarip qaammataani agguaqatigiissillugu minus 14 gradinik ississimasoq. Amaasa Olsen ukiorpassuarni piniarnermik inuussutissarsiortoq ajunaaruteqarujussuassaaq to tonsit Nuummut timmisartukkut nassiuteriikkani tunisinnaanngikkunigit. Amaasa Olsenip nulia piniariaqataasartoq Marlene Olsen ima nassuiaavoq:
- Kalaaliaqqami tuninarusukkaluarpagut, uumasulli nakorsaat oqarpoq qerisuummata tuniniaqqusaanngikkigut.
Neqit pineqartut umimmaat ukiuunerani februaarimi piniagaaneranni pisaneersuupput, pisarereerlugit erngerlugit erlaviikkat, issingaarmallu nalunaaquttap akunneri marluk qaangiutiinnartut qerereersullu, pilattoriarlugit puussianut poortukkat qerititsivinnullu issorarlugit.
Nuummut nassiunneqarput Air Greenlandip piumasaqaatai malillugit suli qeritillugit. Nuummi maanna qerititsivissuarniipput. Igiinnartariaqarlersinnaavaat.
- Qimminut tunniutiinnasssavagut, umiarsuarmukariarlutaluunniit igiinnassavagut? Marlene Olsen aperivoq, ikiorneqarnissartillu ujart orlugu.
Uumasut nakorsaasa piumasaraat qerisuinnaanngitsut aammali tunisassiat aggoriikkat, pujuukkat tarajortikkallu tuniniaqqusaassanngitsut.
- Qerisut suna ajoqutigissagamikku? Marlene Olsen aperivoq, sinerissamilu piniartut tamarmik eqqugaanissaat aarleqqutigalugu.
- Uagut aamma uumaniartussaavugut, akisissaaffeqarpugut, ilaqutaqarpugut, taava suna inuussutigissavarput tuniniaaqqusaanngikkutta? Marlene Olsen naggasiiluni aperivoq.
Marlene Olsenip uia Amaasa Olsen ukiuni 17-ingajanni piniarnermik inuussutissarsiuteqarpoq, 2005-imiillu Kangerlussuarmi najugaqarluni. DMI-p silap qanoq issusaanik nalunaarsuutaasa takutippaa Kangerlussuaq ukiuunerani 30-40 gradit angullugit issittaqattaartoq.
