Umiatsiat piaaraluni pituussaartorneqartut

Serlersaarinerit ulorianaatillit Ilulissani ulluni makkunani atuupput. Tassami umiatsiat sisamat, taakkunannga umiatsiaaqqat pingasut angallallu anginerumaaq ataaseq umiarsualivimmi pitussimaffimminnit pituussaarneqarlutik avammut tissukartinneqarsimapput. Politiit oqariartuuteqarnerat malillugu umiatsiat inuttaqanngitsut avataani saavittut timmisartunit angallatinilluunniit allanit naammattoorneqarunik ujaasinernik aallartitsisinnaapput.
novembarip 13-at 2012 14:39

Umiatsiat sisamat pineqartut sapaatip akunnerani kingullermi sisamanngornermi arfininngornermilu pituussaarneqarsimapput:

- Arfininngormat angallatit sisamaat pituussarneqartoq, sulilu aamma maannakkut nassaarineqanngitsoq, Ilulissani talittarfimmi pitussimaffimminit pituussaarneqarsimavoq. Umiatsiaq Finnmastereq nalitungaatsiartoq, Karl Vinther, Ilulissani Politiit ulluinnarni aqutsisuat oqarpoq.

Umiatsiat pituussaarneqartut marluk saavittut kilisaammit naammattoorneqarlutik Ilulissanut kalinneqarput, umiatsiaararli Finnmastererlu maannamut suli nanineqanngillat.

Karl Vintherillu oqaluttuaraa umiatsiat inuttaqaratik saavittut annaassiniarnermik annertunerusumik aallartitsisinnaasut.

- Angallat avataani inuttaqarani saavittoq timmisartumit imaluunniit angallammit allamit naammattoorneqaruni, kalerrisaarinermik annaassiniarnermillu kinguneqartitsisinnaavoq, Karl Vinther oqarpoq.

Ilulissani politiit umiatsiat pitussimaffiinit pituussaarisunik takunnissimasinnaasunik oqaloqateqarusupput:

- Inuit sisamanngornermi imaluunniiit arfininngornermi angallatinik pituussaarisunik takunnissimasinnaasut oqaloqatigerusuppagut. Naluarput kina taama iliorsimanersoq, naalanngisaarnerusimagunillu sakkortupput, Karl Vinther oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq