Angut oqarasuaatiminik angallattakkamik Ilulissani politiinut kalerriivoq, oqaatigisinnaanaguli sumiinnerlutik. Politiit pasitsaappaat Qasigiannguanut ungasinngitsumiittut, Qasiannguanilu politiinut attaveqarlutik.
Eqqoriaalluarsimaqaallu, umiatsiarmigooq Qasigiannguit kujataatungaanni qeqertap Tugsaap eqqaaniittoq nassaarineqarpoq. Qasigiannguani politiit ittuat, Karl Vinther, Sermitsiamut oqaluttuarpoq, umiatsiap inuttai pingasut sissami ikumatitsilermata sumiissusersisinnaasimagitik.
- Kisianni orsueruttuungajavikkatta, mallerpallaaqimmallu, utiinnartariaqarpugut, umiatsialli inuttai oqarasuaatikkut anagallattakkakkut oqaluussinnaajuarpavut, Karl Vinther oqarpoq.
Qasigiannguarmiulli pisoq Aasiaat radioatigut tusarsimariaramikku ikiuukkiartorput, inuillu pingasut taakku unnuap-qeqqata missaani aaneqarsinnaasimapput. Tamarmillugooq ajunngillat.