Umiatsianik angallanneq sukateriffigineqartariaqarpoq

februaarip 16-at 2006 14:21

Sinersortaatinik angallassineq allanngorpoq, ilaatigut sinerissami illoqarfiit nunaqarfiillu tikinneqartarsimagaluartut tikinneqassaassallutik.

Massakkut sinersortaateqannginnera pissutigalugu meeqqat assammik arsartartut Maniitsumiit sukkasuuliamut ilaatillugit ippassagami Sisimiunukaanniarneqarsimagaluarnerat eqqarsalersitsisoq, imaatigullu angallannermi pissutsit massakkut atuutilersut ernumanartumik kingunbeqarsinnaasut, Maniitsumi palasi Inatsisartunilu ilaasortaasimasoq Isak Davidsen oqarpoq.

- Angallannikkut aaqqissussineq nutaaq pinngitsuunngiivilluni, tikinneqartarunnaartut akornanni umiatsiamik angallanniarnerulernermik kinguneqartussaavoq. Tamannalu aamma kingunerisinnaavoq imaatigut ajunaartut amerlinerannik.

Isak Davidsen erseqqissaavoq sinerissap qanittuani imaatigut angallannermi sillimanissakkut erseqqarissumik malittarisassaqanngitsoq.

- Puttaqummik annanniuteqanngikkuit akiliisitaassaatit taanna atunngilaq, avataasiortunut atuunnerulluni.

Erseqqissaatigaa nunatsinni inupparujussuit ukiumut annaasarigut angalatillutik ajunaartut, puttaqutik imaluunniit atisanik puttassisinnaasunik atugaqannginnerat pissutigalugu.

Imaatigut angallannerup massakkut allanngornera taamaattumik kinguneqarnerloriaannaasoq Isak Davidsen oqarpoq.

Soorlu Upernavimmi, Kangaatsiami immaqalu Nanortalimmi, nunaqarfeqqortuujusuni, umiatsianik angallateqarluni angalasalernerit annertunerujussuanngortussaapput. Tamanna pillugu Naalakkerusisut uittariaqaleraluarput, ulloq manna tikillugu peqqussummik nutarterisoqanngimmat. Pinngitsaalisaanngillat aalisartut piniartut imaluunniit nuannaariartaammik angalasut sillimanissakkut pinngitsaalineqanngillat. Taamaakkami ulorianartorujussuuvoq, aamma nunatta imartaata ulorianartortarpassuaqarnera pissutigalugu peqqussummik sananissaq pisarialerujussuuavoq.

Isak Davidsenip Inatsisartuni 2002-miit 2005-ip tungaanut ilaasortaanermi nalaani imaatigut angallannermi umiatsiaararsortut eqqarsaatiginerullugit maleruagassatigut sukaterisoqarnissaanik pingasoriarluni siunnersuuteqartarsimagaluarpoq iluatsinngitsunik. Inatsisartullu maanna ukiuunerani ataatsimiinneranni umiatsianik imaatigut angalanermi sillimanissamut tunngasunik oqaluuserisassatut siunnersuuteqartoqanngilaq.