Umiatsiaararsortut: Nammineersinnaavugut
Ilulissani umiatsiaaarsortut qaleralinniat ilaat oqarput, Inatsisissatut siunnersuut umiatsiaararsortunik ipititsiniaanerusoq, taakku isumaqarput unammilleqatigiinnermi akit pitsaasut nutarterinissamut periarfissiisut.
-Umiatsiaararsortunut ipisitsiniaaneruvoq, nunamiittut suliffiutilissuit aningaasaatilissuit imaanut pissappata tassa uagut umiatsiaararsortut nunamut pisitaalertut tassuuna taasalukaanngortut, taanna akuerisinnaanngilarput, Illooraq Therkildsen umiatsiaararsorluni aalisartoq aalisarneq pillugu inatsip allannguutissaanut, tassa suliffeqarfiit aamma inuit aalisanermi nutarterinissamut aningaasalersuisalernissaanut periarfissaq akerleralugu taama oqarpoq.
-Uanga isumaqarpunga aningaasaatilissuit kisimik ammaanneqartut, uagutsinnut aalisarnermik piniarnermillu inuutissarsiuteqartunut isumaqarpunga ullumikkut inuunitsinninngaanniit atornarninngortussaasoq, tassami aningaasaatilissuarninngaanniit aqunneqalernissarput taanna tamatta annilaagassutigaarput, Aqqaluk Lothsen Ilulissani umiatsiaararsorluni qaleralinniaq taama oqarpoq, Ilulissani umiatsiaararsorlutik qaleralinniat 20 sinneqartut qaleralinniarunnaarallarnerminni killiffik pillugu maanna oqallittarput.
Taakkualu isummersuutaat Ilulissani umiatsisaararsorlutik aalisartut peqatigiiffiannit Siutamit tapersersorneqarput. Siutami allatsi Johannes Mathiassen isumaqarpoq akit pitsaasut aalisarnermi nutarterinissamut periarfissiisut.
-Massakkut periarfissagissaartorujussuanngornikuuvugut, maani unammilleqatigiinneq aallartinnikuugami. Siornatigut Royal Greenlandimut tulaassarisartakkagut akilernagit eqqussuutiinnarneqartarnikuugamik, taamanikkullu nutarterinissatsinnut akissaqarsimanngilagut. Massakkut periarfissaqalernikuuvugut pisanik kusanartunik tulaassuilluta ikioqatigiilluta nutarterisinnaavugut, avataaninngaanniit akuleruffigineqarnata, Johannes Mathiassen oqarpoq.
Ilulissani aalisartut piniartullu peqatigiiffianni IAPP-imi ilaasortat sisamanngorpat qaleralinniarnermi killiffik pillugu ataatsimiissapput.
