Umiatsiaararsortumik navianartorsiortoqarneraaneq ujaasinermik kinguneqartoq
Kalaallit Nunaanni politiit Nuup innuttaasuisa ilaannit ernumasumit ataasinngornermi ualikkut attavigineqarput. Attaveqartup Nuup saavani umiatsiaararsortoq takusani navianartorsiorunartoq nalunaarutigaa.
Taanna politiinut nalunaaqutaq marlunut qiteqqutilersoq sianerpoq, politiillu angallatiminnik tamatuma kingunitsiannguagut ornigukkasuariarlutik ujaasinermik aallartitsisimasut, politiit pigaartuisa pisortaat Malik Olesen oqarpoq.
- Nuummi innuttaasup Nuup saavata ungasissuani umiatsiaararsortoq malissiorluni navianartorsiortoq takusimavaa.
- Pinartumik pisoqannginnissa qulakkeerumallutigu ornigukkasuarpugut, Malik Olesen oqarpoq.
AAMMA ATUARUK Ujaasineq: Politiit angutip inuusuttup umiatsiaaraa nassaarigaat
Issittumi Sakkutooqarfimmeersut umiatsiaararsortumik periarfeerunneragaasumik ujaasiartoqataallutik politiit ornigukkasuarnerisa kingorna aamma ornigupput. Kisianni nassaanngillat, ujaasinertillu nalunaaqutaq sisamat qaangilaaraa taamatippaat.
- Aamma maqaasinnittoqanngilaq, Malik Olesen oqarpoq.
Kisianni Nuup saavata ungasissuani umiatsiaararsortumik takunnissimasut nalunaaruteqassasut, politiit pigaartuisa pisortaat oqarpoq.
- Nuummut umiatsiarlutik tikittut Nuup saavata ungasissuani umiatsiaarartumik takunnissimasinnaapput, Malik Olesen oqarpoq.
Takunnissimasinnaasut politiit 701448-mut sianerlutik attavigisinnaavaat.
