Umiatsiaararsortoq ipilluni ajunaartoq
Sinersortaatit tikikkiartuleraangata angallateerarsortunit tikilluaqquneqartartut nalunngilarput, angallateeqqallu ilaasa sukkasoorujussuarmik sinersortaatinik kaajallaaniartartut aamma nalunngilarput.
Ærø-mi Danmarkimi ippassaq unnukkut aamma taamaaliortoqarsimavoq, ajutoortoqarporli.
Angutit inuusuttut marluk umiatsiaararsorlutik ikaartaat Marstalfærgen malissimavaat malerujussuillu tinngallattaarfigeqattaarsimallugit.
Umiatsiaaqqap aquuteralaa 70-inik hiisteqarpoq sukkasimaqalunilu.
Strynø-p ungasinngigisaanut pigamik umiatsiaaraq kinngusimavoq, ilaasullu aappaa 24-nik ukiulik ikaartaammiittunit annaanneqarsinnaasimalluni. Angutip aappaa 27-nik ukiulik ipilluni ajunaarpoq.
Angut imaanut nakkartoq suli ujaarineqarpoq, qulimiguullit umiatsiallu ujaarlertinneqaramik.
Angutit ajutoortut puttaquteqarsimanngillat.