Umiatsiaaraannarmik issittumi angalasut

Misilittagaqarusulluinnaqqissaartut pillugit maanna tusagaqassaagut.

Angutit sisamat 1999-miit 2003 tikillugu umiatsiaaqqamik ammaannartumik angallateqarlutik 18.000 kilometeri qalasersuaq avannarlermut ilisimasassarsiorlutik angalaarput. Maannalu angalanermi pingajussaat aallartittussanngorpaat.

Aappassaanik angalagamik illuatungaanut ingerlaarput, Norgep avannaaniit Sibiriap tungaanut ingerlaaramik.

Angalanermi peqataasut marlunnik kalaalersaqarput, Nuummeersoq Frederik Solberg Lynge aammalu Uummannameersoq Ole Jørgen Hammeken angalaqataapput, aammattaaq angalasut russimik angalaqateqarput.

Angalatuut ullumi aallanngitsiartut DR-meersup Mette Valsted Vestergårdip oqaloqatigai.

- Ilaannikkut sivisuallaamik aallaqqasimariaraangatta soorunami qiianartaqaaq, pitsaalluartunilli attallaaqartarpugut, Anders Bilgram oqarpoq.

Umiatsiarli 6 meteriinnarmik angissuseqarmat inissaq killeqarpoq. Attallaat nassatassat killeqartariaqarput Anders Bilgram angalaqataalu allat pingasut benzinamullu dunkit tamarmik inissaqartinneqassappata.

Aammattaaq umiatsiaq ammaannartuummat soorunami initaqanngilaq isikkivissuarlu kusanaqisoq ilaanni misigineqarsinnaasarpoq.

- Assersuutigalugu sikorpassuit akornanniilersinnaasarpugut unnuami qatsunganersuarmi qaammassuaq saqqarluni pigaangat nipaassuarmi iluliarsuit sikulluunniit quperpallattaasut tusaasarpagut, ilaanneeriarluni puisi eqqatsinni puisarpoq iluatitsigaangattalu aamma nannumik takusarluta, Anders Bilgram oqaluttuarpoq.

Anders Bilgram nassuiaavoq, ilisimasassarsiorlutik angalanermi annersaat nunamiittarlutik illoqarfinnilu inunnik oqaloqateqartarlutik.

- Atlantikup avannarpasissuani Viking-itoqqat naapippagut, Kalaallit Nunaannilu eskimo-t Inuit naapillutigit, aammattaaq Sibiriami Thutkti naapillutigit; Anders Bilgram oqarpoq.

Taakku angalaqatigiit umiatsiamik quleqanngitsumik angallateqarlutik nunatta kujataanut angalapput, taamatuttaaq Canada-miillutillu Russit imartaaniipput.

Oqaluttuarpullu kingullermik angalanerminni Sibiriap avannaani anorersualiussaasimallutik.

- Anorersuarsioratta malissuarsiuissorpugut, taamani nuannerunnaavikkaluarpoq, oqarpoq

Taamaakkaluartoq angalallutik ingerlaartut anusinngunngillat, pilersaarutigaallu Københavnimiit qalasersuup avannarliup tungaanut umiatsiaq quleqanngitsoq atorlugu ingerlaassallutik. Naatsorsuutigaallu nannunik taavani naammattuuisarumaarlutik.

- Manna tikillugu ingerlaarnitsinni nannut 17-t naammattoorpavut. Ataasersuaq tungitsinnut kamaleraluarpoq, sikutamiilluni qatimaattorsuulluni umiatsiatta iluanut ujakkartertarluni umiatsiatta iluanut pissingajaavittutut pissusilersorluni pivoq. Motor-ittali aappaa sakkortuseqattaarlugu periaratta bamsi taanna annilaangalerluni qimaalluni aallaqaaq, Anders Bilgram oqaluttuarpoq.

Angutit taakku sisamat 12000 kilometeri ingerlaartussaavaat, 5000 kilometerilli tungaannaanut ingerlagallassapput, ukiorulu angerlarallariarlutik angallavissami sinnera aasaru ingerlaviginiarpaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat