Umiatsiaaqqanik nangikkiaasut

Nunaqarfimmiut aalakoorlutik umiatsiaaqqanik Kangaatsiamut nangikkiaasarput tassani imigassanik tuniniaaneq kingusinnerusukkut matusarmat. Tamanna ulorianarpallaartoq isumaqartoqarpoq, kommuneli ammasarfinnik allannguilersaanngilaq.
Allattoq Noah Mølgaard
novembarip 21-at 2011 08:33

Peqatigiiffiit katersuiniartillugit imigassamik sassaallerneq unnuakkut nalunaaqutaq 01.00 matusarpoq. Illuanilli Kangaatsiami imerniartarfimmi sassaallerneq pingasunut aatsaat matusarluni. Tamanna pissutigalugu Niaqornaarsummiut umiatsiaaqqanik unnuakkut Kangaatsialiartarsimapput erngunneq nalunaaquttap akunnerinik arlalialunnik sivisuneruniassammat.

Taama pisoqartarnera Siumut sinnerlugu Qaasuitsup Kommunia kommunalbestyrelsemi ilaasortap Otto Jeremiassenip tikkuarpaa. Taanna isumaqarpoq peqatigiiffiit imigassallersinnaanerat annertusisariaqartoq.

Timersoqatigiiffiit peqatigiiffiillu allat inuiaqatigiinni pitsaasumik sullisserusuttut marloqiammik inissisimapput. Immiaaqqanik tuniniaaneq isertitsissutiginerpaasarpaat. Kisianni peqatigiiffiit Qaasuitsup Kommuniani imigassamik sassaallertarnermut malittarisassat malittariaqarpaat, tassanilu peqatigiiffik ataaseq ukiumut marloriaannarluni imigassanik tuniniaanertalimmik aaqqissuussisinnaatitaavoq. Malittarisassat malillugit sassaallerneq kingusinnerpaamik nalunaaqutaq 01.00 unereersimasussaavoq.

Kangaatsiap eqqaani pisartut pissutigalugit immiaaqqanik tuniniaanerup nalunaaquttap qanoq ilinerani unittarnissaanik kommuuni allannguerusulersinngilaa.

- Aaqqissuussinerit tamakkut imerniartarfimmik ingerlatsinermut eqqaanartuussanngillat, taamaammat inassutiginarpoq imigassamik sassaallerneq kingusinnerpaamik ataatsinut unittassasoq, Qaasuitsup Kommuniata allaffeqarfia taama inassuteqarpoq kommunalbestyrelsep novembarip 23-iani ataatsimiinnissaanut.

Qaasuitsup Kommuniani aningaasarsiornikkut tamaviaarnartorsiorneq peqatigiiffilerisut aamma malugaat bingo assigisaallu atorlugit katersuiniarnerit isertitsissutaarpiarunnaarmata. Kisianni immiaaqqanik tuniniaaneq tassaavoq timersortartut GM-imut angalanissaannut matussutissanik isertitsissutaanerpaasartoq.

Imigassamik sassaallertarnermut malittarisassat pillugit Qaasuitsup Kommunia arlalinnit saaffigineqartarsimavoq. Allaffissornermiit siunnersuutigineqarpoq aaqqissuussinerni taamatut ittuni peqatigiiffiit imigassallersinnaanerat ukiumut marlunniit sisamanut annertusisariaqartoq.

Allaffissornermiit aamma inassutigineqarpoq imigassaq pillugu Qaasuitsup 2012-mi politikkiliussasoq tassanilu ilanngunneqassasoq peqatigiiffiit imigassallersinnaanerannut tunngasut.