Umiatsiaaqqanik aallarussisut Ilulissani tigusaasut
Ilulissani politiit angutit inuusuttut pingasut sisamanngorneq juulip arfineq aappaat tigusaraat. Taakku Uummannami umiatsiaaqqanik marlunnik benziinanik tankinillu tilligarsinnarlutik Ilulissiarsimapput.
- Inuusuttut tillittut ilaqutaasa Ilulissani ilisimatippaatigut Ilulissanut tikingajalerlutik nalunaarsimasut. Tikinnerminni tigusarineqarput pasineqarlutik umiatsianik orsussanillu tillissimasutut, Ilulissani politeeqarfimmi ulluinnarni aqutsisoq Kasper Berthelsen KNR-imut taama oqaluttuarpoq.
Angutit inuusuttut isertitsivimmi unnuisinneqareerlutik aqaguani iperarneqarput. Politiit maanna misissorpaat umiatsiaaqqat qanoq ililluni Uummannamut utertinneqassanersut.