Umiatsiaaqqamik tillittut ujaaraat
Angutit inuusuttut marluk 19-nik 20-nillu ukiullit umiatsiaaqqamik 16 fods-imik 40 hk-nik motorilimmik Nanortalimmi tillissimapput. Taakku maanna kujataani ujaarineqarput.
Allattoq Noah Mølgaard
oktobarip 14-at 2011 09:12
Umiatsiaaraq tillinneqartoq maanna nassaarineqareerpoq angutilli inuusuttut taakku suli ujaarineqarput. Taakku kingullermik takuneqarput nunaqarfimmi Tasiusami Nanortallip kujataani sisamanngornerup ullaassaq nal. 04.30-ip missaani.
- Umiatsiaaraq Nanortallup illoqarfiata akiani sisamanngornermi ualikkut nassaarineqarpoq sissamut tipisimasoq inuillu maqaasineqartut peqanngillat, politiit nalunaarput.
Politiit angallataat "Sisak III" ujaasinermi peqataavoq taamatuttaarlu umiarsuit nakkutilliissutit Hvidbjørnen aamma Ejnar Mikkelsen peqataallutik. Ujaasinermi aamma helikopteri umiatsiaaqqallu pullattakkat arlallit atorneqarput.
Kujataani silarlussimavoq anoraasuasarnerit sekundimut 25-30 meterinik sakkortussuseqartarsimallutik.
