Umiatsiaaqqamik juullimi tunisittoq
Ilaqutariit Glindorf Christensenikkut katersuiniarnerminni 47.000 koruunit Hermann Stachimut tunniussassat katersorsimalerpaat.
Ilaqutariit taakku marluk qanittumik ataqatigiipput ilaqutariit Glindorf Christensenikku Hermann Stachip panianut ukiuni arlalinni angajoqqaarsiaasimammata. Hermann Stachip umiatsiaaraa tillissinnarlugu inuusuttut marluk ajutoorsimasut tusaramikkut erngerlutik katersuiniarnertik aallartissimavaat. Sapaatip akunnerata naanerani qaangiuttumi Roskildep umiarsualiviani aningaasanik katersuiniarlutik tombolartitsisimapput. Tamannalu ilimagisamit ingerlalluarnerusimasoq Jens Glidorf Christensen nalunaarpoq. Sapaatip akunnerata naanerinnaani 10.000 koruuninit amerlanerit katersorneqarsimapput.
Aningaasat Nanortalimmi Piareersarfimmi pisortamut Kurt Pedersenimut isumagisassanngortinneqassapput taassumalu Hermann Stach inuussutissarsiutitigut taarsigassarsinissaanik ikiussavaa. Hermann Stach siullermik qinnuteqarami ilisimatinneqarpoq 2011-mut agguaassassat tamarmik atorneqareersimasut taamaammat ukiumi nutaami qinnuteqaqqittariaqartoq.
Umiatsiaaqqap pilerigisaata M19-mik taaguutillip pissarsiarinissaanut piumasarineqarpoq siuleqatussaata 70.000 koruunit inulaarlugit annertussusillip 35 procentia nammineq katersorsimassagaa.
Kurt Pedersen neriuppoq Hermann Stach ikiorsinnaassallugu imaani natsersuarniarlunilu nipisat suaannik upernaamut katersinissaanut. Taakkuuppummi Nanortalimmi inuussutissarsiutigalugu piniartut isertitsissutigisinnaasatuaasa ilaat.
Katersuiniarneq maanna pisortatigoortumik unippoq, taamaattorli januaari tikillugu suli kontomut ikisisoqarsinnaasoq Glindorf Christensen ilisimatitsivoq.
