Umiartortut marluk Qaqortup eqqaani ajunaarput
Qallunaat marluk umiarsuarmi “Orasila”-mi inuttaasut, umiarsuup umiatsiaani issimatillugit umiatsiaat kinngummat ujaarineqalersut, Qaqortumi politiinut ippassaq unnukkut arferngup missaani nalunaarutigineqarpoq.
Angutit marluk 47-nik 18-nillu ukiullit, uuliamik assartuummi "Orasila"-mi qulinik inuttaqartumi inuttaasimapput. “Orasila”-miit orsussap maqinneqarneranut atortussaq slangersuaq puttasinnaasoq Saarlumi nunamut ikaarunniartillugu umiatsiaat kinngusimavoq, angutillu imaanut nakkarlutik. Aatsaallu nalunaaquttap akunneri tallimat qaangiuttut angutit timaat ipeqqasut nassaarineqartut, politimestereqarfik nalunaarpoq.
“Orasila”-mili alianartut tamaanga killeqanngillat.
Unnua-qeqqalersoq politiinut kalerriutigineqarpoq, “Orasila” Qaqortumiit nalunaaquttap akunneri marlussuinnaat ungasitsigisumiilluni aamma ikkarlittoq putusimasorlu. Orsussamik assartuut suli ikkarleqqavoq ulippallu unnuaru (ulinnerpaassaaq nal. 23:41, aaqqi.) kaanngartinniarneqarnissaaq.
- Kisianni uuliamik mingutsitsisoqarneranik takussaasoqanngilaq, politimesterip tullersortaa Morten Nielsen oqarpoq.
“Orasila” umiarsuaatilinnit N.H.Simonsenimit Svendborgimi angerlarsimaffeqartumit pigineqarpoq, PolarOilimillu uuliamik assartuisussatut attartorneqarsimalluni.
“Orasila”-mi ajutoornerit Imarsiornermik Qullersaqarfik peqatigalugu politiinit misissorneqaleruttorput, Qaqortullu eqqartuussiviani pisunut atatillugu killisiuisoqassaaq.
“Orasila” Qaqortumi umiarsualivisseqqagallassaaq.
