Umiartortut akileraarneq ajorput
Nunatsinni suliffeqarfiit arlallit nunat allamiut umiarsuaannik attartortarput. Royal Arctic Linep attartorsimavaa umiarsuaq ikkarleqqasoq Vega Sagittarius Liberiamiut erfalasuannik erfalasulik. Savalimmiormiut umiarsuaataat Nordkyn avannaani nunaqarfinnut pajuttortinneqartoq aamma attartugaavoq.
Taamatuttaaq uuliamik pilersuisoq Polar Oil iliuuseqarpoq. Taakku imarmik ikaarlugu orsussamik assartuisutut Maersk Edgar attartorpaat umiarsuillu mikinerumaat Orasila aamma Oratank nunatta sineriaani orsussamik pajuttortinneqarlutik.
Umiartortut 100-ut inulaarlugit amerlassusillit nunanit allaneersut Danmarkimeersullu nunatta imartaani angalapput. Taakku saniatigut Royal Arctic Line umiarsuaatimi inuttaannik atorfeqartitsivoq. Umiarsuit anginerit nalunaarsorneqarsimapput Dansk International Skibsregisterimi. Taakkunanilu inuttat assigiissutigaat akileraarneq ajoramik.
Tamanna erserpoq attaveqatigiinnermut naalakkersuisup Jens B. Frederiksenip Siumumeersumut Karl Lyberthimut akissutaani. Taanna paragra 37 naapertorlugu apeqquteqarpoq umiarsuarni inuttat paasisaqarfigineruniarlugit.
Royal Arctic Linep oqaluttuarisinnaanngilaa umiarsuarni Vega Sagittariusimi aamma Nordkynimi inuttat qanoq akissarsiaqarnersut umiarsuit attartorneqarmata inuttai ilanngullugit.
Umiarsuilli nunatsinneersuunerat allamiuunerallu apeqqutaatinnagu assigiissutaavoq akileraarutaasussaanngitsunik akissarsiaqartaramik umiarsuaq inuttaaffiat Dansk International Skibsregisterimi nalunaarsorsimappat.
