Umiarsuup uuliamik assartuutip iperagaanissaa Iranip piumasarigaa
Gibraltarimi oqartussaasut naapertorlugit umiarsuaq uuliamik akuiagaanngitsumik Syriamukaassiartoraluarpoq, tamannalu EU-p pillaatitut iliuusaanut akerliuvoq.
Iranip ministereqarfiani qaffasissumik atorfilittaq oqarpoq, maannamut paasissutissat naapertorlugit uuliamik assartuutip USA-mit piumasarineqartumik tigusarineqarami maannakkorluinnaq iperagaanissaanik inassuteqarluni.
Umiarsuup uuliamik assartuutip 330 meterinik takissusillip "Grace 1"-ip tigummiallarneqalernera piffissami Iranip EU-llu attaveqarneranni pingaaruteqartumi pivoq.
EU-p Iranimik atomip nukinganik atuisinnaaneq pillugu isumaqatigiissut, USA-mit siorna peqataaffigineqarunnaartoq atuutitiinnarusuppaa.
Iranili atomip nukinganik atuisinnaaneq pillugu isumaqatigiissutip ilaannit pituttorneqarunnaarluni nalunaarutigereerpaa, tamannalu europamiunit ernummatigineqarpoq.
Paasissutissalli arlallit naapertorlugit tuluit umiarsuarmik tigusarinninnerat USA-mit EU-minnaanniinngitsorlu piumasarineqarsimarpasippoq.
BBC naapertorlugu USA-p umiarsuamik tigusarinninnissaq piumasarigaa Spaniap nunanut allanut tunngasunut ministeriata EU-llu nunanut allanut tunngasunut politikkimut siuttussaagunagaata Josep Borrelip oqaatigaat.