Umiarsuup nunatsinneersup Grønlandskaji qimattariaqaraa

Umiarsuaq tingerlaatilik oqaluttuarisaanermullu pingaarutilik M/S Signe Rink, Københavnimi Grønlandskajitoqqami assortuunnermi qitiuvoq. Umiarsuup piginnittuata Det Arktiske Husillu umiarsuup inissisimaffigisaani atugassarititaasut isumaqatigiinngissutigaat.

Umiarsuaq M/S Signe Rink, Christianshavnimi Arktisk Instituttip saavani Grønlandskajimi ukiuni 18-ini talinngavoq. 

Umiarsuaq 1953-ernisaasoq Nunatsinni landshøvdingip pigisimavaa, kingornalu politiit nakorsallu angallatigisimalluni, aamma Dronning Margrethep Kunngissallu Frederiup Nunatsinni angalanerminni atorsimavaat.

Tamaangali killeqarpoq. Talittarfimmimi inissanik attartortitsisup, peqatigiiffiup Det Arktiske Husip, ilaatigut Arktisk Instituttip Chroma Film ApS-illu inissisimaffigisaata umiarsuarmik piginnittumut 61-inik ukiulimmut Werner Blohmimut talittarfimmi inissamik attartornermut isumaqatigiissutini atorunnaarsippaa.

Attartornermut akiliniutinik akiliinngitsoortarneq, fiisterfiuallaarnera umiarsuarnilu allaniittunik aaqqiagiinngissuteqartarnerit pissutigalugit attartortitsisartut pissutsit naammagiunnaarsimallugit, Arktisk Instituttimi pisortaq Bent Nielsen KNR-imut oqarpoq.

- Umiarsuaq umiarsuillu allat maaniittut aaqqiagiinngissuteqarsimapput, aamma pissutsit allat uatsinnut ajornakusoortut pisimapput, tamannalu uatsinnut ajuusaarnarpoq Signe Rinkimimmi pitsaasumik suleqateqarnissarput ilimagisimagaluaratsigu. Paarlattuanilli nuanninngitsunik eqqissiviilliortoqartarneranillu pisortaqarsimavoq, taamaattoqarneralu uagut peqataaffigerusunngilarput.

TALITTARFIMMIINNERMUT AKIT

Christianshavnimi talittarfiit Statens Ejendomsstyrelsep pigisarai.

Suliffeqarfiilli namminersortut peqatigiiffiillu Det Arktiske Husitut Nordatlantens Bryggetullu ittut talittarfinnik attartortitsineq namminneq aqutaraat.

Taliffissamik Nordatlantents Bryggemit meterinik 15-inik qanitsigisumi attartorneq apriilip aallaqqaataanit septembarip 30-ata tungaanut ullormut  500 koruuneqarpoq. 

Oktobarip aallaqqaataanit marsip 31-ata tungaanut ullormut 350 koruuneqarpoq.

                                       Najoqqutarisaq: Nordatlantens.dk


Talittarfimmiinnermut akit qaffanneqartut
M/S Signe Rinkimilli piginnittup, Werner Blohmip, tamanna KNR-imut ilumuunnginnerarpaa.

Umiarsuaq umiarsuaatileqatigiiusimasunit umiarsuarmik atuisimasunit aserfallatsaaliuisimanngitsunillu Blohmimut 2014-imi tunniunneqarpoq.

Werner Blohmillu umiarsuup nutarterneranut 100.000 koruunit sinnerlugit atorsimavai suli nutartigassaqangaatsiarluni.

Werner Blohm oqaluttuarpoq umiarsuarmi pulaartoqartuarluni. Namminerlu naliliinera malillugu attartornermik atorunnaarsitsineq eqqissiviilliortoqarneranik pissuteqarani peqatigiiffiup Det Arktiske Husip aningaasarsiorniarneranik pissuteqarpoq.

Det Arktiske Husimmi talittarfimmik attartortitsinermut akit nammineerluni aalajangersarsinnaavai.

- Umiarsuit oqaluttuarisaanermut pingaarutillit qimaatinneqarput, aningaasaatilissuit angallatitik plastikkimik sanaat maaniitiniassammatigit, taakkulu (Det Arktiske Hus, aaqq.) aningaasarsiorniassammata, Werner Blohm taama oqarpoq.

M/S Signe Rink talittarfimmiinnermut maannamut qaammammut 1250 koruuninik akiliuteqartarpoq. Tamannalu 'ikinngummut akikillisaanerusoq' Det Arktiske Husip siulersuisuini ilaasortaq Chroma Filmimillu piginnittoq, Anders Dylov, taama oqarpoq. 

Nordatlantens Bryggelli akigititai nutaat naapertorlugit ima isikkoqalerput: Aasaanerani ullormut 500 koruunit - qaammammut 15.000 koruunit. Ukiuunerani ullormut 350 koruunit - qaammammut 10.500 koruunit. 

Akillu taama qaffasitsigisut Werner Blohmip akissaqartinngilai.

Grønlandskaji kalaallit kulturiannut takussutissartaqanngitsoq

Werner Blohm, M/S Signe Rinkimullu eqqaamiuusut arlallit isumaqarput Det Arktiske Hus illorsuup saavani umiarsuarmik  akimarpalunnerusumik talinngasoqarnissaa kissaatigigaa Grønlandskajillu oqaluttuarsartaa tunulliunneqartoq.

- Kikkut tamaasa qimagutsinneqarput, maani pioreersut nungulerpaat.

- Ingasappallaaqaaq. Signe Rinkip kulturikkut kingornussassaaneranik soqutigisaqanngilluinnarnerannik takutitsiinnarpoq, Werner Blohm taama oqarpoq.

Tassungalu atatillugu, Arktisk Instituttimi pisortaq, Bent Nielsen, ima oqarpoq.

- Kalaallit Nunaanneerpalaartunik maani avatangiiseqartitsinissamut pisussaaffeqanngilagut. Tassa taamaappoq. Aappaattullu: Aap, umiarsuup Signe Rinkip maaniinnerata Det Arktiske Husimut Nordatlantens Bryggemullu tulluartuunera isumaqataaffigilluinnarpara. (…) Attartuinermilli atorunnaarsitsinissamik aalajangernerput umiarsuup pineqartup pisarissersuutaavallaarneranik pissuteqarpoq.

Det Arktiske Hus naapertorlugu, havnefogedimik talittarfimmi inissanik aqutsisussamik apriilip aallaqqaataa aallarnerfigalugu sulisoqalissaaq.

Tamannalu pereerpat Werner Blohm sumiiffimmi akit atuuttut naapertorlugit talittarfimmi inissamik attartornissamik qinnuteqaqqinnissaminut periarfissaqassaaq, siulersuisuni ilaasortaq Anders Dylov taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat