Umiarsuup aquttua "annertuumik ikiligaasoq"
Umiarsuaq alapernaarsuut Vædderen Reykjavikimit Tunup sineraanut arfininngorpat aallassaaq, Sareximillu sungiusarneq aqqutaata ilaani aallartissaaq.
Umiarsuarmut ilaapput "ajoqusersimasut" 20-t, taakkulu qanoq ajoqusersimanersut suli nalunaarutigineqanngikkallarpoq.
"Annertuumik ikiligaasimasuusaartussatut" peqataapput politiinngorniat aqqaneq marluk, taakkulu saniatigut aamma politiini atorfillit arfineq pingasut peqataapput.
Peqataasussat Nuummeersut arfininngormat timmisartorlutik Reykjavikiliartussaagaluarput, Nuummili Islandimilu silarlunnera pissutigalugu siusinaarlutik sisamanngormat aallartinneqarput.
Tamatuma kingunerisaanik Politiit angallataannit Sisannit peqataasussat sisamat apuutinngitsoorput. Ilaasutuarlu tassaavoq Jens Peter Broberg, Sisammi Nuummi angerlarsimaffeqartumi aquttuusoq.
- Matumani sungiusarneq Tappimmik sungiusarnernut peqataaffigisimasannut naleqqiullugu annertunerujussuuvoq. Sungiusarnissami pissangarnerpaavoq sumiiffissarput, Jens Peter Broberg oqarpoq. Taanna 2005-imiilli Sisammiilerpoq, umiarsuarmillu meterinik 26-nik takitigisumik sømilerpassuit angalasimavoq.
- Imaani annaassiniarnissamik sungiusarnerit makku pisariaqarput, eqqaamalluinnarparami umiarsuaq assartuut Vega Saggitarius Nuup eqqaani ikkarlimmat. Taamani ajornerusumik pisoqarsimasinnaagaluarnera eqqartorparput - tassami umiarsuaq takornariartaat aamma ikkarlissimasinnaagaluarmat, Jens Peter Broberg oqarpoq.
Jens Peter Broberg ukiormannalu Sareximik sungisarnermut peqataaqatai Danmarkstrædemut silagissiorlutik angalanissartik naatsorsuutigisinnaavaat. Sumiiffimmummi silassamik nalunaarut malillugu sekundimut meterinik arfineq pingasunik anoreqassaaq maliillu meterinik sisamanik angitigissallutik.
