Takornarniartaassuaq, M/S Europa, Tysklandiminngaaneersoq, Tunumullu aqagu tassa aqqusaartussaq, nalinginnaasuunngilluinnarpoq. M/S Europami tassaavoq umiarsuarni nunarsuaq tamakkerlugu karakteriginnerpaaq.
- M/S Europa akimasoorujussuuvoq, suite-tiinnarnik initaqarpoq. Ininik taassallugit eqqunngilaq, suite-vissuuppummi akimaqqiffissaqanngitsut. Umiarsuarmi inuttat sullitaminnut kiffartuussinerat aamma assissaqanngilaq, Kalaallit Nunaanni Takornariaqarnermi Inuussutissarsiornermilu Siunnersuisoqatigiinneersoq, Malik Milfeldt, oqaluttuarpoq.
M/S Europap Illoqqortoormiunut aqqusaarneratigut illoqqortoormiormiut qilanaarisinnaavaat takornarnianik 400-nik takusaqarnissartik, tassa Tysklandimiit, Ă˜strigimiit Scheizimiillu aggersuunerusunik. M/S Europap Illoqqortoormiunut tikinneratigut umiarsuarmik aatsaat taama angitigisumik akimatigisumillu Illoqqortoormiunut tikittoqassaaq, illoqqortoormiormiullu malugisinnaasaannut ilaavoq umiarsuarlutik takornarniat tamaanngarnissaminnut kajumikkaluttuinnartut, Malik Milfeldt oqarpoq.
- Ineriartorneq malinnaavigilluinnaqqissaarparput, umiarsuarsuimmi takornarniartaatit taama angitigisut nunaqarfimmiunut nunattalu karsianut aningaasarsiutaalluaraluartut, illoqarfimmut taama mikitigisumut tikissinnaanerat aamma killeqarsinnaavoq, Malik Milfeldt oqarpoq.
Takornarniartitsineq Illoqqortoormiuni ukioq manna aallarteqqammerpoq, M/S Europallu aqagu tikinneratigut takornarniartaatit Tysklandimeersut sapaatip akunnerani uani tikittut aappaat misigineqassaaq.