Umiarsuit takornariartaatit Canadap Issittortaani umiarsualivinnut tulaqqusaajunnaartut

Umiarsuit takornariartaatit Canadap Issittortaani nunaqarfinnut illoqarfiilluunniit arlaannut tulassinnaatitaassanngillat.

Umiarsuit takornariartaatit Canadap Issittortaanut ukioq manna tulassinnaatitaassanngitsut, Canadap angallannermut ministeriata Marc Garneaup tallimanngornermi nalunaarutigaa.

COVID-19-ip akiorniarneqarneranut atatillugu taama inerteqquteqartoqalerpoq. Canadap avannaani peqqissaaveqarfiit killeqarnerat pissutaalluni taama aalajangertoqartoq, Canadap angallannermut ministereqarfiata nalunaarutigaa.

Umiarsuit takornariartaatit suulluunniit, angisuut minnerillu ukioq manna tulassinnnaatitaassanngillat. Canadap sinneranut tunngatillugu tassani aalajangiisoqarallarpoq juulip aallaqqaataata tungaanut tulassinnaatitaasoqassanngitsoq.

Canadami innuttaasut isumannaatsuunissaat ministereqarfimmit pingaarnerpaatinneqartoq, angallannermut ministerip Marc Garneaup oqaatigaa:

- Coronavirusip tuniluutilertornera pakkersimaarniassagutsigu umiarsuit takornariartaatit Canadap imartaani angallannerisa kinguartinneqarallarnissaannut aalajangiinissamut allatut periarfissaqanngilaq, Canadap angallannermut ministeria oqarpoq, erseqqissaatigalugulu taama aalajangernissaq ajornakusoorsimasoq, pissutsillu allanngoriartorneri aallaavigalugit ingerlaavartumik naliliisoqartarnissaa pisariaqartoq.

Isummersuutit