Umiarsuit takornariartaatit aningaasatigut iluaqutaalluarput
Tamakku tamarmik Akileraartarnermut Pisortaqarfiup aamma Nunatsinni Takornariaqarnermi Inuussutissarsiornermilu Siunnersuisoqatigiit immersuisitsillutik apersuinerannit paasineqarput. Apersuinermi paasinarsivoq, Nunatsinni umiarsuarsuarnik takornariartitsineq, nunarsuatsinni takornariarfiusartunut allanut, aningaasarsiornikkut 2008-mili ajornartorsiorfiulersunut naleqqiullugu eqqugaannginnerusimasoq.
Umiarsuarsuarnik takornariartartut 2009-mi ikilerialaaraluariarlutik amerleriaateqarsimapput. Takornariat tikittartut ukiuni arfineq pingasuni 9.500-nit 30.000-inut amerleriarsimapput. Tamannalu niuernerup annerulerneranik kinguneqarpoq.
Ilaasunut akitsuummit 16 millionit koruunit Nunatta Karsianut isertinneqartarput. Taakkulu saniatigut illoqarfinnut nunaqarfinnullu tikinneqartunut katillugit 50 millionit koruunit missaannik isertitsissutaasarlutik. Tamakku saniatigut ilaasutik maani taarseraangatigik, talittarfimmut talikkaangamik akitsuutinillu akiliillutik aamma orsussanik atortussanillu pisigaangamik suliffeqarfiit soorlu Air Greenland, Royal Arctic Line aamma KNI aningaasatigut iluaqusertarpaat.
Tamatuma peqatigisaanik tikeraartorissallugit akikitsuupput. Piserusussuseqarluartarlutik umiarsuarsuarni najugaqartaramik Nunatsinnullu aningaasartuutaanngitsumik illoqarfinnut nunaqarfinnullu toqqaannartumik apuuttarlutik. Tammajuitsussanillu pisisarnermikkut aallanillu aaqqissuussanut aningaasatigut iluaqusiisarlutik. Tassami isumassarsiullaqqinnikkut takornariat misigerusutaannik sunilluunniit akiliisinneqarsinnaasarput.
Tamannalu arlalitsigut iluaqusiisarpoq.
Nunaqarfinni soorlu Ukkusissani, Niaqornani aamma Itillimi umiarsuarnik takornariartartut, tamaani takornarianik aaqqissuussisarnernut ineriartortitseqataapput. Aamma soorlu assersuutigalugu umiarsuarsuarni takornariat aningaasanik katersuiniarnerisigut Illoqqortoormiuni basketballertarfimmik pilersitsisoqarpoq.
Tamatuma peqatigisaanik Pilersuisoq umiarsuarnik takornariartitsisartut ilaannik illoqarfimmut ukiumut arlaleriaannarluni tikinneqartartumut naatitanik nassartitsisarnissamik isumaqatigiissuteqarsimavoq. Taamaattumik takornariat nunarsuarmi qeqertat annersaanut tikikkaangata qungujulaffiginissaannut pissutissaqarluarpoq.
