Umiarsuit takornariartaatit amerliartorput
Aningaasaqarnermut Naalakkersuisup Aleqa Hammond-ip erseqqisarpaa sumiffinni ataasiakkaani takornariaqarnerup annertusarneqarneratigut aningaasatigut isertitsissutaasartut qulakkeerneqassasut, tamannalu Alaskami misilittakkat aallaavigalugit Kalaallit Nunaata ilinniarsinaagaa.
Umiarsuit takornariartaatit amerlasuut illoqarfinnut nunaqarfinnullu tikikkaangata illoqarfinni nunaqarfinnilu najugaqartut peqataasussaapput isertitassatillu isertittarlugit. Sumiiffinni ataasiakkaani takornarianik suliaqartut umiarsuarnik takornariartaatinik angallassisartut toqqaannartumik isumaqatiginniartassavaat, qallunaat takornarianik suliaqartut iluanaarutissaannik pinnani. Sumiffinni ataasiakkaani najugaqartut takornariat tikilluaqqusassavaat angallallugillu taamaaliornikkut iluanaarutaasinnaasut iluanaarutigalugit, Aleqa Hammond sapaatip akunnerani kingullermi Join Commite-mi ataatsimiinnermut atatillugu oqarpoq.
Alaskami takornariaqarnikkut sulineq sukkasuumik ineriartorpoq. Umiarsuit takornarianik angallassisut sumiiffiit ilaanni namminneerlutik takornarianik isumaginnittarput, umiarsualivinnik suliaqarnermi aqqusiniorneq tammajuitsussanillu tuniniaanermi taamaalillutik isertitsissutaasinnaasut namminneerlutik iluanaarutigalugit. Tamatuma kinguneraa sumiiffinni najugaqartut takornarianit tikittunit iluanaaruteqartannginnerat. Ineriartornerup tamaattup Kalaallit Nunaanni pinngitsoortinneqarnissaa naalakkersuinermik suliaqartut anguniarpaat, taamaattumillu Alaska-mi takornarianik suliaqartut misilittagaannik ilinniartariaqarpugut, GTE-imi pisortaq Thomas Rosenkrands oqarpoq. Taanna oqarpoq, umiarsuit takornarianik angallasisartut Kalaallit Nunaannut tikittartut ukiuni makkunani amerliartortut ukiumut procent-inik 30-nik amerlisarlutik.
Assersuutitut taaneqarpoq, Kalaallit Nunaanni Takornariaqarnikkut Inuussutissarsiutitigullu siunnersuisoqatigiiffiup GTE malillugu, Alaska-mi illoqarfimmi Juneau-imi 4000-inik innuttaqartumi, ukioq 2005-imi takornariat 945.00-init tikipput. Kalaallit Nunaanni ukioq 2007-imi takornariat umiarsuarnik takornariartaatinut ilaasut 23.000-it tikipput.
