Umiarsuit sorsuutit Danmarkip peqataatissagunarpai

Danskit umiarsuaataat sorsuutit pingasut, Peter Tordenskjold, Ravnen aamma Glenten, Naalagaaffiit Peqatigiit imaani sakkutuuini eqqissisimatitsiniartuni peqataassanersut suli paasinarsinngikkaluartoq, umiarsuit taakku, tyskit umiarsuaataat sorsuutit arlallit peqatigalugit, Tysklandimi Wilhelmshavenimiit Immap Akullersuup tungaanut aqagu aallassapput.

- Imaani eqqissisimatitsiniarnermi tyskit siulersortaaqqullugit Naalagaaffiit Peqatigiit qinnuigereerpaat, qularutiginngilarpullu danskit arlaatigut peqataasariaqassasut. Danskit umiarsuaasa sorsuutit pingasut taakku atorfissaqartinneqalernissaat neriuutigaarput, atortorissaaramimmi tamarmik piukkunnarput, sakkutuut imarsiortut qullersaqarfianni kommandøri, avammut aamma oqaaseqartartuusoq, Jan Leisborch oqarpoq.

Danmark siusinnerusukkut assingusumik suliaqareerpoq – taamaammat ikiuunnissaat naatsorsuutigineqarpoq.

- Sakkunik Libanonimut imaatigut eqqusseqqusinnginneq atortinniarlugu umiarsuarnut allanut usilersorneq misissueqqissaartarnerlu suliassaavoq. Serbiami taamaattoqarmat taama sulineq misilereerparput, Jan Leisborch oqaluttuarpoq.