Umiarsuit nutaat tallimat Royal Arctic Linemut
Royal Arctic Linep umiarsuit tallimat 2015-imi ukiup affaani siullermi tunniunneqartussanngorlugit umiarsualiorfimmut Remontowamut suliakkiissutigisimasavai. Polenimi umiarsualiorfimmut umiarsuarnik nutaanik piniartoqannginnerani RAL-ip tunngavissat misissoqqaarsimavai. umiarsuillu Tysklandimi sanatitassatut pisariaqartitaat naammassineqarsinnasut paasineqarsimavoq. Tamannalu pissutigalugu umiarsuit nutaat tallimat Polenimi sanatitassatut piniarneqarsimapput. umiarsuit tallimat tassaapput:
Umiarsuaq ataaseq Mary Arcticatut ilusilik. Useqarsinnaassusia: 606 TEU (containerit tyvefodsit), taanna Arina Arcticamut taarsiunneqassaaq. Atlantikorsuakkut aamma Nunatsinni assartueqqittartutut angalasarnermi saniatigut, immikkut suliassanut Tunumut, Pituffimmut aamma Sikuiuitsumut Kujallermut atorneqartassaaq.
Umiarsuaaqqat marluk angissutsimikkut akunnattut. Useqarsinnaassusiat: Tamarmik immikkut 108 TEU. Umiarsuaaqqat Pajuttaammut aamma ukiut tamaasa attartortarneqartartumut ataatsimut taartaassapput, annertunerpaamik avannaani pilersuinermut atorneqassapput ukiuuneranilu assartueqqittarnermut.
Umiarsuaaqqat mikinerit marluk nunaqarfiliartaatit. Useqarsinnaassusiat: Tamarmik immikkut 30 TEU. Umiarsuaaqqat nunaqarfiliartaatinut aserfallassimaqisunut taartaassapput ukiorlu kaajallallugu nunaqarfinnik pilersuinermik ulapputeqartassallutik.