Umiarsuartigut takornariaqarneq siuarsarnialerpaat

apriilip 12-at 2007 17:14

Atlantikup Avannaa, nunarput ilanngullugu, umiarsuartigut takornarianik angallassinermik nunarsuarmi ineriartorfiunerpaanngorniarpoq.

Takornariat umiarsuarsuarnut ilaallutik Nunatsinnut siorna tikittut 22.000-iupput, ukiup siulianut naleqqiullugu 33 procentimik amerleriarlutik.

Taamaattumik takornariaqarnermik suliaqartut Canadami Nunatsinneersut, Islandimeersut, Savalimmiuneersut Tuluillu Nunaanneersut suliniuteqarnissaminnut atatillugu qaammat kingulleq atsioqatigiipput, Atlantikup Avannaata umiarsuartigut takornariarfikkuminarneranik nunarsuarmiunut malunnartitsinissamik imaqartumik.

-Umiarsuit ingerlaartarfissaannik umiarsuaatilinnut saqqummiussinissaq suleqatigiinnerup kingunerissavaa. Uagut anguniarparput umiarsuarsuit amerlanerusut nunatsinnukartalernissaat, Nunatsinni Takornariaqarnermut Inuussutissarsiornermullu Siunnersuisoqatigiinni umiarsuarnik takornarianik angallassisunik ataqatigiissaarisoq Anders la Cour Vahl oqarpoq.

Umiarsuarsuarnut ilaallutik takornarianut akileraarutit Nunatta karsianut 2006-imi 10 million koruuninik isertitsissutaapput, ukiup siulianut naleqqiullugu marloriaatinngorsimallutik.