Umiarsuarsuit tikeraleqaat

marsip 10-at 2006 07:32

Nuuk aasamut umiarsuarnik takornarianik aatsaat taama amerlatigisunik tikeraartoqartussanngorpoq.

Umiarsuarsuit takornarianik 300-t 600-llu akornanni ilaasoqartussat tikissapput, umiarsuarli Maaskam, USA-meersoq 1300-t missaani takornarianik ilaasoqartussaq tamanit annersaassaaq.

Takornariat ingerlaqqinnginnerminni tamatigut ulloq ataasiinnaq Nuummeeqqaartassapput.

- Umiarsuarsuit Nuummut tikitsillugit pisiniarfinnut Nuummiittunut isertitsiffiulluartarput, takornariat illoqarfimmi aningaasarpaalunnik atuisarmata, Nuummi takornariartitsivik Nuuk Tourism taama nalunaarpoq.

Takornariartitsiviit suli amerlanerusut Nuummut tikittarnissaat ussassaarutigiumallugu nunarsuarmi umiarsuit takornariartaatit pillugit ussassaarinersuarmut Miami-mi USA-miittumi pisussamut ukioq manna Nuummi takornariartitsisartut peqataassapputtaaq.

Oqaatigineqarporlu nunanit 118-neersunit nerriviit tuniniaaviusussat 1.000-iussasut.

Umiarsuit takornariat Nuummut siorna tikeraarneranni takornariat katillugit 10.000-t Nuup illoqarfiani angalaarlutik takornariarput.