Umiarsuarsuaq nunarsuarmi anginerpaaq singinneqangajalerpoq

Umiarsuarsuaq containerinik angallassisartussaq, nunarsuarmi annerpaajusussaq, singissallugu A.P. Møller – Mærskip pilersaarutigaa. Umiarsuaq Danmarkimi Lindø-p amutsiviani sananeqarpoq, pilersaarutillu malillugit arfininngorpat tulliani atserneqassaaq.

Umiarsuaq qanoq atserneqassanersoq A.P. Møller-Mærskip – pisarnermisupajaaq – isertuuppaa, umiarsuillu pillugit aviisimut saqqummersartumut, Lloyds Listimut, innersuussilluni.

Aviisip taassuma umiarsuaq tassaanerarpaa containerinik angallassisartut annersaat, tassami 399 meterisut takitigaa 53 meterisut silitsigaluni.

Arsaattarfiit sisamat kattullugit angissusipajaavisut umiarsuaq tassa angissuseqarpoq.

Containerit nalinginnaasumik angissusillit katillugit 13.000-it umiarsuup taassuma usisinnaassavai.

Containerinik assartuutip mannamut annerpaap containerit 10.000-t usisinnaavai.

Umiarsuarsuaq taanna juulimi singinneqartussaagaluarpoq, aquttarfiatali annersaa maskiinaqarfialu juunimi ikuallammata tamanna kinguarpoq.