Umiarsuarnut takornariartaatinut ilaasumut akitsuut Naalakkersuisut atorunnaarsinniarpaat
Akitsuut taanna Naalakkersuisut atorunnaarsinniarpaat umiarsuullu angissusia aallaavigalugu umiarsualivissinnermi akitsuut atorneqalissasoq siunnersuutigineqarpoq.
Naalakkersuisut siunnersuutaat inatsisartuni sisamanngormat siullermeerlugu oqaluuserineqarmat Naalakkersuisoqatigiit partiivinit tapersersorneqartoq, illutungiliuttut partiivinit isumaqatigineqanngitsoq.
Naalakkersuisut siunnersuutaat takornarianik sullissisunit nuannaarutigineqarpoq.
- Umiarsuarnik takornariartaatinik angallassisartut oqaloqatigigaangakkit, Kalaallit Nunaannut angallassinnginnissartik isumaliutigisarpaat ilaasunut akitsuutip qaffasippallaarnera pissutigalugu, takornariartitsivimmi Greenland Cruises-imi Sisimiuniittumi pisortaq Ivik Knudsen Ostermann oqarpoq.
Umiarsuit takornarianik angallassisartut Kalaallit Nunaannut 2010-mi tikittut takornarianik 30.000-nik ilaasoqarput taakkualu ikileriangaatsiarput 2013-imi 8.504-nik ikileriarsimagamik.
Aamma atuaruk Takornarialerisuunikoq: Naalakkersuisut imminnut aaginnarput
Akitsuutip allanngortinneqarnissaata siunertaraa, Naalakkersuisut siunnersuutaat malillugu, umiarsuit takornariartaatit amerlanerusut Kalaallit Nunaannut tikittalerniassammata aamma akitsuutinik akiliisitsisarnerup ajornannginnerulernissaa anguniarlugu.
Akitsuut akilerneqartassaaq umiarsuit takornariartaatit angissusaat malillugu, umiarsualivinnut arlalinnut umiarsualivissinneq apeqqutaatinnagu.
Akitsuutip allanngortinneqarneratigut umiarsuit takornarianik angallassisut amerlanerusut Kalaallit Nunaanni umiarsualivissittalernissaat Sisimiuni takornariartitsivimi Greenland Cruise-mi pisortap Ivik Knudsen Ostermann siulittuutigaa.
Takornariamut ataatsimut akitsuut atorunnaarsinneqarpat umiarsuit takornariartaatit aasat tamaasa Kalaallit Nunaannut tikittalernissaat naatsorsuutigaara, aamma tamanna umiarsuarnik takornariartitsisartunit tusarneqarmat umiarsuit takornariartaatit amerlasuut Kalaallit Nunaannut tikittalernerannik kinguneqarluni, Ivik Knudsen Ostermann oqarpoq.
Naalakkersuisut siunnersuutaani atuarneqarsinnaavoq umiarsuarni takornariartaatini ilaasumut ataatsimut akitsuut peerneqarpat, isertitsissutigineqartartut 8,3 million kr-nik ikinnerulissasut, taakkuali umiarsuit takornariartaatit amerlanerusut nunatsinnut tikittalernerisigut isertitsissutigineqartartussat amerliartorumaartut.
Ivik Knudsen Ostermann isumaqanngilaq takornarianut akitsuut maanna 525 kr-niusoq takornariat iluanaarutigineq ajoraat - tassami umiarsuit takornariartaatit angisuut illoqarfiit ilaanni angisuuni soorlu Nuummi talissinnaanngimmata, ikaassorneqartarlutillu aamma taliffigineqartartut puttasut takornarianik taama amerlatigisunik ikaassuifigineqarsinnaanngimmata, tamannalu illoqarfinni amerlasuuni ajoraluartumik atuuppoq, Ivik Knudsen Ostermann oqarpoq.
Inuussutissarsiornermut Aatsitassanut suliffeqarnermullu pisortaqarfik Kalaallit Nunaanni umiarsuarnik takornariartaatinik takornariartitsisarnernik naatsorsuisimavoq tassanilu takuneqarsinnaavoq ilaasunut akitsuut qaffasissuusoq, nunanik umiarsuarnik takornariartaatinik tikinneqartartunut unammillertigisatsinnut soorlu Islandimut Svalbard-imullu sanilliulugit.
Naalakkersuisut siunnersuutaat taamatut isikkoqartillugu Inuit Ataqatigiinnit aamma Partii Naleqqamit isumaqatigineqanngilaq.
Siunnersuut aappassaaneerneqartinnagu Aningaasaqarnermut Akileraartarnermullu Ataatsimiititaliamut innersuunneqarpoq.